بە تۆمەتی ساختەکاری 18 فەرمانبەر و کارمەندی بانک لە کەرکووک دەستگیرکران

ئاڤا نیوز

دەزگای ئاسایشی نیشتمانی لە پارێزگای کەرکووک، هەڵوەشاندنەوەی تۆڕێکی ڕێکخراوی گەندەڵی ڕاگەیاند کە لە 18 کەس پێکهاتبوون. تۆڕەکە  لە فەرمانبەری حکومی، کارمەندی بانک و وەبەرهێنەر پێکهاتوون، تۆمەتبارن بە دەستکاریکردن و ساختەکاری لە کەرتی خانووبەرەدا و هەوڵدان بۆ بەهەدەردانی زیاتر لە هەشت ملیار دیناری عێراقی.

وێنە گەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات.

ڕاگەیێنراوی فەرمی: بەگوێرەی ڕاگەیێنراوی دەزگاکە، ئۆپەراسیۆنەکە دوای وەرگرتنی ڕەزامەندیی دادوەری و لە ڕێگەی هەماهەنگیی هەواڵگری و مەیدانییەوە ئەنجامدراوە. لێکۆڵینەوەکان دەریانخستووە کە تۆڕەکە دوو شێوازیان بۆ فێڵکردن بەکارهێناوە:

یەکەم: وەرگرتنی قەرزی وەهمی لە ڕێگەی پێشکەشکردنی بەڵگەنامەی ساختەوە بە ناوی هاووڵاتییانی بێئاگا، بە بەڵێنی دابینکردنی یەکەی نیشتەجێبوون بۆیان لە چوارچێوەی پرۆگرامێکی حکومیدا. لەم ڕێگەیەوە، دەست بەسەر (30) مامەڵەی دیکەدا گیراوە کە ئامادەبوون بۆ خەرجکردن.

دووەم: هەوڵدان بۆ دەستبەسەرداگرتنی پارچە زەوییەکی حکومی بە ڕووبەری (57 هەزار و 500 مەتر دووجا) لە ڕێگەی بەکارهێنانی بەڵگەنامەی ناهاوتاوە بە مەبەستی داگیرکردنی موڵکی دەوڵەت.

زانیاریی زیاتر: دەزگای ئاسایشی نیشتمانی جەختی کردووەتەوە کە ئۆپەراسیۆنەکە سەرکەوتوو بووە لە ڕێگریکردن لە بەهەدەردانی نزیکەی هەشت ملیار دیناری عێراقی.