وەزیری پەروەردەی عێراق بۆ ئاڤا: قەرز وەربگرین قوتابخانە لە کوردستانیش دروست دەکەین

ئاڤا نیوز

وەزیری پەروەردەی عێراق بە ئاڤا میدیای ڕاگەیاند، پەیوەندییەکانیان لەگەڵ وەزارەتی پەروەردەی هەرێمی کوردستان بەهێز و بەردەوامن، لەو چوارچێوەیەشدا ئەگەر قەرزی چینی بۆ عێراق بەردەوام بێت، هاوشێوەی ناوچەکانی دیکەی وڵات قوتابخانەی نوێ لە پارێزگاکانی هەرێمی کوردستانیش دروست دەکەن.

چیرۆکی سەرەکی: ئەمڕۆ پێنجشەممە لە شاری هەولێر وەزارەتی پەروەردەی حکومەتی هەرێمی کوردستان، بە ئامادەبوونی وەزیری پەروەردەی عێراق، سێیەمین کۆڕبەندیی پەروەردەیی کوردستان بەڕێوەچوو.

لێدوانی فەرمی: ئیبراهیم نامس جبووری، وەزیری پەروەردەی عێراق لە لێدوانێکی تایبەتدا بە ئاڤا میدیای ڕاگەیاند، "پەیوەندییەکانمان لەگەڵ وەزارەتی پەروەردەی هەرێم پەیوەندییەکی پتەو و بەردەوام و بەهێزن، لەساڵی ڕابردووەوە ئەوە چوارەمین دیدار و کۆبوونەوەی هاوبەشمانە کە دوایینیان لەبارەی بەئەلیکترۆنیکردن و بابەتی ژیریی دەستکرد بوو، ئێمە لەئەمساڵدا لەبواری فێرکردنی پیشەییدا بەشی ژیریی دەستکردمان کردووەتەوە و ساڵی داهاتووش بۆ قۆناغی دووەم بابەتی ئاسایشی ئەلیکترۆنی زیاد دەکەین".

زانیاریی زیاتر: لەبارەی ڕێککەوتنی چین و عێراقیش بۆ دروستکردنی قوتابخانە، ئیبراهیم نامس جبوری وتی، "لەچوارچێوەی ڕێککەوتنمان لەگەڵ چین بڕیارە چوار هەزار قوتابخانە دروستبکرێن، بەڵام تائێستا هەزار قوتابخانە تەواوبوون، ئێستاش کارکردن بۆ قوتابخانەی نوێ وەستاوە و پڕۆژەکە ڕەوانەی سندووقی عێراق بۆ گەشەپێدان کراوە، ئومێد دەکەین لە چەند ساڵی داهاتوو قوتابخانەی سێ دەوامی و دوو دەوامی کۆتایی پێبێت، ئێستاش هیچ قوتابخانەیەکی قوڕ لە وڵاتدا نییە، ئەگەر قەرزی چینیش بۆ دروستکردنی قوتابخانە هەبێت کوردستان پشکی تایبەتی خۆی دەبێت".

لەلایەکی دیکەوە: پەیوەست بە گواستنەوەی ڕاژەی مامۆستایانی سنووری کەرکووک و نەینەوا لە وەزارەتی پەروەردەی هەرێمی کوردستانەوە بۆ سەر حکومەتی فیدراڵ، وەزیری پەروەردەی عێراق ئەوەی خستەڕوو، گواستنەوەی ڕاژەی مامۆستایان لە سنووری کەرکووک و نەینەوا لە حکومەتی کوردستانەوە بۆسەر حکومەتی فیدراڵ هەرچەندە لە یاسای بودجە و ڕێککەوتنەکاندا هەیە، بەڵام ئێستا وڵات یەک بودجەی هەیە و وەزارەتی دارایی عێراق بەیەکجار و پێکەوە مووچە بۆ هەرێم و هەموو ناوچەکانی دیکەی وڵات خەرج دەکات.

باکگراوند: ساڵی 2019 عێراق و چین ڕێککەوتن لە بەرامبەر پێدانی نەوت بە وڵاتە، چین پڕۆژەی گەورەی ژێرخان لە عێراق دروستبکات و کاری لەپێشینەش درابوو بە دروستکردنی قوتابخانە، بەڵام لەکۆتایی ساڵی ڕابردووەوە ڕێککەوتنەکە وەستاوە و دەوترێت بەهۆی گوشاری ئەمریکاوە بووە بۆسەر بەغدا تا هەماهەنگی ئابووری لەگەڵ چین ڕابگرێت.