پڕۆژەیەکی گەورەی ستراتیژیی ئاو بۆ بەردەڕەش جێبەجێ دەکرێت

ئاڤا نیوز

بڕیارە لە مانگی داهاتوو بەردی بناغەی پڕۆژەیەکی گەورەی ستراتیژی ئاو لە سنووری قەزای بەردەڕەش دابنرێت، کێشەی کەمئاوی لە سنووری بەردەڕەش و گوندەکان چارەسەر دەکات.

وێنە گەورەکە: بەهۆی جێبەجێکردنی پڕۆژەیەکی ئاو لە قەزای بەردەڕەش و ناحیەی دارەتوو لەگەڵ دەیان گوند، لە کێشەی دابینکردنی ئاوی خواردنەوە ڕزگاریان دەبێت، حکومەتی هەرێمی کوردستان ڕەزامەندی لەسەر جێبەجێکردنی پڕۆژەیەکی گەورەی ستراتیژی داوە کە ئاوی زێی گەورە بۆ ناوچەکە ڕادەکێشرێت، گوژمەیەکی تایبەتی بۆ دابینکراوە.

لێدوانی فەرمی: ئاری ئەحمەد، بەڕێوەبەری گشتیی ئاوی هەرێمی کوردستان، بە ئاڤا میدیای ڕاگەیاند: حکومەتی هەرێمی کوردستان ڕەزامەندی لەسەر پڕۆژەی ئاوی قەزای بەردەڕەش داوە، بەهۆی پڕۆژەکەوە سەنتەری قەزای بەردەڕەش و ناحیەی دارەتوو و 58 گوندی دیکە لێی سوومەند دەبن.

- گوژمەی دابینکراوە بۆ پڕۆژەکە نزیکەی 305 ملیار دینار دەبێت، بڕیارە لە مانگی داهاتوو بەردی بناغەی دابنرێت و دەست بە جێبەجێکردنی بکرێت، بەو هۆیەوە کێشەی کەمئاوی لەو ناوچەیە بە شێوەیەکی بنەڕەتی چارەسەر دەکات.

بۆچی گرنگە: بە تەواوبوونی ئەم پڕۆژەیە، جگە لە دابینکردنی ئاوی خواردنەوەی بەردەوام بۆ دانیشتووان، دەبێتە هۆی بووژاندنەوەی کەرتی کشتوکاڵ و ئاژەڵداری و گەشەپێدانی زیاتری ژێرخانی ئابووری لە سنووری قەزای بەردەڕەش بەشێوەیەکی گشتی.