وتەبێژی دادگای سلێمانی بۆ ئاڤا: فەرمانی دەستگیركردنەكە بەپێی ماددەی 56 دەرچووە

ئاڤا نیوز

وتەبێژی دادگای سلێمانی تایبەت بە ئاڤا ڕایدەگەیەنێت، فەرمانی دەستگیركردنی لاهور شێخ جەنگی لە ڕۆژی پێنجشەممە دەرچووە پاڵپشت بە ماددەی 56 لە یاسای سزاكانی عێراقی و یاسای تیرۆر.

وێنە گەورەكە: هێزێكی زۆری ئەمنی لە لالەزار لە دەوروبەری ماڵی لاهور شێخ جەنگی، سەرۆكی بەرەی گەل بڵاوەی پێكراوە، هاوكات لە زۆربەی شەقام و شوێنە گشتییەكانی شاری سلێمانی، هێزی ئەمنی و ئۆتۆمبێلی سەربازی جێگیر كراون و دۆخی شارەكە نائارام دەردەكەوێت.

لێدوانی فەرمی: دادوەر سەڵاح حەسەن، وتەبێژی دادگای سلێمانی ڕوونی كردەوە، ئەو ماددەیەی فەرمانی دەستگیركردنی پێ دەرچووە، پێویستی بە ئاگاداركردنەوەی پێشوەختە نییە، بەو پێیەی ماددەكە پەیوەستە بە ڕێككەوتنی تاوانكاریی گرووپێك یاخود كۆمەڵێك كە مەترسی دەخاتە سەر تێكدانی ئەمن و ئاسایشی گشتی.

دادوەر سەڵاح ئەوەشی باسكرد، تۆمەتبار بەجێگەی ئەوەی دەستگیر بكرێت، دەتوانێت خۆی ڕادەستی یاسا بكات، ئەو كات ئەو هەڵوێستەی لەبەرامبەر دادگا بە هەند وەردەگیرێت و لە ئەگەری ساغبوونەوەی تاوانەكە لەسەری، سزای سووكتری لەسەر دەسەپێندرێت.