ژمارەیەکی زۆر هەمەر لە دەوروبەری ماڵەکەی لاهووری جەنگی جێگیرکراون

ئاڤا نیوز

شەوی ڕابردوو، هێزێکی زۆر بۆ دەستگیرکردنی لاهووری شێخ جەنگی چووەتە بەردەم ماڵەکەی، بەڵام تا ئێستا نەتوانراوە ناوبراو دەستگیربکەن.

زانیاریی بەدەستهاتووە: پەیامنێری ئاڤا ڕایگەیاند، ژمارەیەکی زۆر هەمەر و ئۆتۆمبێلی سەربازی لە دەوروبەری ماڵەكەی لاهور شێخ جەنگی، سەرۆکی بەرەی گەل جێگیرکراون، هاوکات هێزێكی زۆر لە گوندی گەشتیاریی سەناریاوە بەرەو هۆتێلی لالەزار جێگیركراون.

لێدوانی فەرمی: لاهوور شێخ جەنگی بۆ ئاڤا میدیاقسەی کرد و ڕایگەیاند، "من لە ماڵی خۆم دانیشتووم و دەبێت سنوور بۆ سەرەڕۆیی كەسانێك دابنرێت".

لەلایەکی دیکەوە: دادوەر سەڵاح حەسەن، بە ئاڤا میدیای ڕاگەیاند، لە ڕۆژی پێنجشەممەوە بە ماددەی 56 لە یاسای سزادانی عێراقی بڕیاری دەستگیرکردنی لاهوور شێخ جەنگی دەرچووە، تۆمەتەکەشی بریتییە لە ڕێکەوتنی چەند کەسێک بۆ تێکدانی ئەمن و ئاسایشی شاری سلێمانی.

زانیاریی تایبەت: سەرچاوەیەک لە لالەزار بە ئاڤا میدیای ڕاگەیاند، خێزان و ماڵ و منداڵەکەی لە لالەزار لەگەڵ خۆی ماوەتەوە.

ئەمەش بزانە: لاهووری شێخ جەنگی بە تەلەفۆن ئاگادار کراوەتەوە کە خۆی ڕادەست بکات، بەڵام ناوبراو ڕەتیکردووەتەوە خۆی ڕادەست بکات.