هێزێکی ئەمنیی سلێمانی دەستی بەسەر کەناڵی زوومی لاهوور شێخ جەنگیدا گرت

ئاڤا نیوز

هێزێكی ئەمنیی سلێمانی هەڵیانكوتایە سەر كەناڵی زوومی سەر بە لاهوور شێخ جەنگی و بەڕێوەبەرێكی كەناڵەكەش بۆ ئاڤا ئاشكرای دەكات كە ئێستا هێزە ئەمنییەكە دەستی بەسەر كەناڵەكەدا گرتووە.

چیرۆکی سەرەکی: ئێوارەی ڕۆژی پێنجشەممە هێزە ئەمنییەكانی سلێمانی چواردەوری هۆتێل لالەزار و شوێنی نیشتەجێبوونی لاهوور شێخ جەنگی، سەرۆكی بەرەی گەلیان گرت و داوایان لێ كرد خۆی و چەند كەسێكی دیكەی نزیك لێی ڕادەست بكات، ئەمەش بەپێی بڕیاری دادوەر، بەڵام ناوبراو ڕازی نەبوو بەمە و دواجار كاتژمێر (3:00) بەرەبەیانی ئەمڕۆ شەڕ و پێكدادان لەنێوان هێزە ئەمنییەكان و هێزەكەی لاهوور شێخ جەنگی دەستی پێكرد و دواجار بەرەبەیانی ئەمڕۆ دەستگیركردنی لاهوور شێخ جەنگی و پۆڵاد شێخ جەنگی برای و ڕێبوار حامید حاجی غالی بەرپرسی هێزی دووپشكی سەر بە لاهوور شێخ جەنگی دەستگیر كران و لە ئەنجامی شەڕەكەش سێ كەس لە هێزە ئەمنییەكان كوژران و زیاتر لە 15 كەسیش لە هەردوو لا بریندار بوون.

زانیاریی تایبەت: سەرچاوەیەك لە بەڕێوەبەرایەتیی كەناڵی زوومی سەر بە لاهوور شێخ جەنگی بە ئاڤا میدیای ڕاگەیاند: لە كاتژمێر (7:00) بەرەبەیانی ئەمڕۆ سەرجەم كارمەندانی ئۆفیسی سەرەكیی كەناڵی زووم و ئۆفیسەكانی دیكەی كەناڵەكە لە شارەكانی كوردستان چوونەتە ماڵەوە و دوای ئەوەی هێزێكی ئەمنیی سلێمانی هەڵیانكوتاوەتە سەر ئۆفیسی سەرەكی كەناڵەكە و دەستیان بەسەردا گرتووە.