وەزارەتی دەرەوەی تورکیا: لە نزیکەوە چاودێریی پێشهاتەکانی سلێمانی دەکەین

ئاڤا نیوز

وەزارەتی دەرەوەی تورکیا ڕاگەیێنراوێکی لەبارەی شەڕ و ئاڵۆزییەکانی سلێمانی بڵاوکردووەتەوە دەڵێت: لە نزیکەوە چاودێریی پێشهاتەکان دەکەین. 

چیرۆکی سەرەکی: ئێوارەی ڕۆژی پێنجشەممە هێزە ئەمنییەكانی سلێمانی چواردەوری هۆتێل لالەزار و شوێنی نیشتەجێبوونی لاهوور شێخ جەنگی، سەرۆكی بەرەی گەلیان گرت و داوایان لێ كرد خۆی و چەند كەسێكی دیكەی نزیك لێی ڕادەست بكات، ئەمەش بەپێی بڕیاری دادوەر، بەڵام ناوبراو ڕازی نەبوو بەمە و دواجار كاتژمێر (3:00) بەرەبەیانی ئەمڕۆ شەڕ و پێكدادان لەنێوان هێزە ئەمنییەكان و هێزەكەی لاهوور شێخ جەنگی دەستی پێكرد و دواجار بەرەبەیانی ئەمڕۆ دەستگیركردنی لاهوور شێخ جەنگی و پۆڵاد شێخ جەنگی برای و ڕێبوار حامید حاجی غالی بەرپرسی هێزی دووپشكی سەر بە لاهوور شێخ جەنگی دەستگیر كران و لە ئەنجامی شەڕەكەش سێ كەس لە هێزە ئەمنییەكان كوژران و زیاتر لە 15 كەسیش لە هەردوو لا بریندار بوون.

ڕاگەیێنراوی فەرمی: وەزارەتی دەرەوەی تورکیا ڕاگەیێنراوێکی لەبارەی گرژی و ئاڵۆزییەکانی سلێمانی بڵاوکردووەتەوە و تیایدا هاتووە: ئێمە لە نزیکەوە چاودێریی پێشهاتەکانی سلێمانی دەکەین کە بۆ سەقامگیری و ئارامی عێراق و سەلامەتی هاووڵاتیانمان زۆر گرنگن.


لەلایەکی دیکەوە: وەزارەتەکە باسی لەوەشکردووە؛ کونسوڵخانەی گشتیمان لە هەولێر هەوڵی  گەیشتن بە لایەنە پەیوەندیدارەکان دەدات بۆ  دڵنیابوون لەوەی کە ڕێککاری پێویست بۆ هاووڵاتییانمان دەگیرێتەبەر.