دەزگای ئاسایشی هەرێمی کوردستان: سەرەتا لە لالەزارەوە تەقە لە هێزەکانمان کراوە

ئاڤا نیوز

دەزگای ئاسایشی هەرێمی کوردستان ڕاگەیێنراوێکی لەبارەی ئاڵۆزییەکانی شەوی ڕابردووی سلێمانی بڵاوکردەوە و تیایدا هاتووە: شەوی ڕابردوو هێزەکانمان توانیان هۆتێل لالەزاری سلێمانی کۆنترۆڵ بکەن و سەرجەم ئەو کەسانە دەستگیر بکەن کە ڕووبەڕووی هێزەکانمان بوونەوە. 

چیرۆکی سەرەکی: ئێوارەی ڕۆژی پێنجشەممە هێزە ئەمنییەكانی سلێمانی چواردەوری هۆتێل لالەزار و شوێنی نیشتەجێبوونی لاهوور شێخ جەنگی، سەرۆكی بەرەی گەلیان گرت و داوایان لێ كرد خۆی و چەند كەسێكی دیكەی نزیك لێی ڕادەست بكات، ئەمەش بەپێی بڕیاری دادوەر، بەڵام ناوبراو ڕازی نەبوو بەمە و دواجار كاتژمێر (3:00) بەرەبەیانی ئەمڕۆ شەڕ و پێكدادان لەنێوان هێزە ئەمنییەكان و هێزەكەی لاهوور شێخ جەنگی دەستی پێكرد و دواجار بەرەبەیانی ئەمڕۆ دەستگیركردنی لاهوور شێخ جەنگی و پۆڵاد شێخ جەنگی برای و ڕێبوار حامید حاجی غالی بەرپرسی هێزی دووپشكی سەر بە لاهوور شێخ جەنگی دەستگیر كران و لە ئەنجامی شەڕەكەش سێ كەس لە هێزە ئەمنییەكان كوژران و زیاتر لە 15 كەسیش لە هەردوو لا بریندار بوون.

ڕاگەیێنراوی فەرمی: ڕاگەیێنراوێک لە دەزگای ئاسایشی هەرێمی کوردستان لەبارەی ڕووبەڕووبوونەوەی چەکداری شەوی ڕابردووی سلێمانی: لە ڕووبەڕبوونەوەیەکی چەکداریدا شەوی ڕابردوو هێزەکانمان توانیان هۆتێل لالەزاری سلێمانی کۆنترۆڵ بکەن و سەرجەم ئەو کەسانە دەستگیر بکەن کە ڕووبەڕووی هێزەکانمان بوونەوە. 

دوای ئەوەی لەلایەن دادگای لێکۆڵینەوە ئاسایشەوە فەرمانی دەستگیرکردن بۆ ماددەی 406 لە یاسای سزادانی عێراقی بۆ داواکار "لاهوور شێخ جەنگی بورهان" و ژمارەیەک داواکراوی دیکە دەرچوو، فەرمانەکە ئاراستەی هێزەکانمان کرا، بەڵام دوای هەوڵی زۆری هێزەکانمان بۆ خۆڕادەستکردنی داواکراوان بەڵام بەهۆی پابەند نەبوون بە یاساوە و لە زاری خۆیان ڕایانگەیاند: کە ملیشیای چەکدارییان هەیە و ڕووبەڕووی ئاسایش دەبنەوە، ئەوان دەستیانکرد بە تەقەکردن لە هێزەکانمان و ڕووبەڕووبوونەوە ڕوویدا. 

زانیاریی زیاتر: دەزگای ئاسایشی هەرێم لە بەشێکی دیکەی ڕاگەیێنراوەکەیدا باس لەوەدەکات: ئەم هەنگاوە پاڵپشت بە بڕیاری دادگا نراوە و لە پێناوی جێبەجێکردنی فەرمانی دەستگیرکردن، ئەمەش بۆ ئەوەیە کە هیچ تاقم و لادرێک لە یاسا نەبێت و ئاسایش و ئارامی پارێزراوبێت وەکو هەمیشە.  

لەلایەکی دیکەوە: لە ئەنجامی ئەو شەڕ و ڕووبەڕبوونەوەیە سێ ئەندامی هێزە ئەمنییەکان کوژراون و 19ی دیکەش برینداربوون.