ئاڤا بەدواداچوون بۆ چارەنووسی یانەی نەورۆز دەكات

ئاڤا نیوز

ئاڤا لە سەرچاوەیەكی كارگێڕیی یانەی نەورۆزەوە زانیویەتی، دەنگۆی هەڵوەشاندنەوەی یانەكە، دوورە لە ڕاستی و، نەورۆز لە ململانێی سیاسی و حیزبی بەدوور دەبێت.

چیرۆکی سەرەکی: دوای گرژی و ئاڵۆزییەكانی شەوی 22ـی ئابی شاری سلێمانی و دەستگیركردنی لاهور شێخ جەنگی، دەنگۆی هەڵوەشاندنەوەی یانەی نەورۆز كە لەلایەن لاهوور شێخ جەنگییەوە سەرۆكایەتی دەكرێت، باس دەكرێت.

زانیاریی بەدەستهاتوو: ئاڤا سپۆرت بەدواداچوونی وردی بۆ چارەنووسی یانەی وەرزشی نەورۆز كردووە و لە زاری چەند سەرچاوەیەك لە كارگێڕیی یانەكەوە زانیویەتی كەوا ئەو دەنگۆیانەی لەبارەی هەڵوەشاندنەوەی یانەكە هەن، دوورن لە ڕاستییەوە و نەورۆز بەدوور دەبێت لە ململانێ سیاسی و حیزبییەكان.

زانیاریی زیاتر: تیپی تۆپی پێی یانەكە كە ئێستا سەرقاڵی خۆئامادەكردنە بۆ وەرزی نوێی خولی ئەستێرەكانی عێراق، تا دوێنێ پێنجشەممە لە مەشق و ڕاهێنانەكانی بەردەوام بووە و، تەنانەت نیازی وایە ئەمساڵ بە گڕوتینی زیاتر لە ساڵانی ڕابردوو، ڕكابەری یانەكانی عێراق بكات، ئەوەش بە پاڵپشتی جەماوەرە دڵسۆزەكەی و یاریگە قەشەنگەكەی.

لەلایەكی دیكەوە: ڕۆژی 13ـی ئەم مانگەش، دەستەی كارگێڕی یانەكە كۆبوونه‌وه‌ی ئاسایی خۆی به‌ ئاماده‌بوونی هێرش كەمال، جێگری سه‌رۆكی یانە و ته‌واوی ئه‌ندامانی ده‌سته‌ی كارگێڕی ئەنجامدا و پلانێكی ورد و درشت داڕێژرا بۆ وه‌رزی نوێی خولی ئه‌ستێره‌كانی عێراق و خۆئاماده‌كردنی‌ سه‌رجه‌م تیپی تۆپی پێی ئاسته‌ ته‌مه‌نییه‌كانی یانه‌كه‌ بۆ به‌شداریكردن له‌ خوله‌كانی عێراق و كوردستان و دیاریكردنی ڕاهێنه‌ران و پێكهێنانی تیپه‌كان و گرنگیدان به‌ بۆنه‌ وه‌رزشییه‌ جۆراوجۆرەكان.

ئەوەی لەبارەیەوە دەوترێت: چێنەر عەبدولقادر، پێشكەشكاری ژمارە یەكی وەزرشیی كوردستان ڕایگەیاند، ئەوەی جێی دڵخۆشییە، یانەی نەورۆز و یاریزان، و ئیدارە وەرزشیەکەی لە هیچ کێشەیەکی سیاسی و یاساییدا نین و قەت نەبوونەتە بەشێک لە کێشەکان، هەرگیز شەڕی حیزبیان نەکردووە.

پێشكەشكاری ئاڤا سپۆرت داوا لە وەرزشدۆستان، ڕۆژنامەنووسان، بەڕێوەبەرایەتیی وەرزش، کۆمپانیاکان و خواپێداوانی سلێمانی دەكات، هەموو بێنە سەرخەت بۆ پاراستنی یانەی نەورۆز و هاوكاریكردنی، بۆ ئەوەی لە پیشاندانی جوانییەکانی بەردەوام بێت، لەپێناو پێشخستنی كایەی وەرزشی سلێمانی و بەهێزكردنی یانە و دامەزراوە وەرزشییەكانی ئەو شارە.