وەزیری بەرگری ئیسرائیل هەڕەشەی وێرانکردنی غەززە دەکات

ئاڤا نیوز

وەزیری بەرگری ئیسرائیل، هەڕەشەی ئەوە دەکات کە شاری غەززە وێران دەکەن ئەگەر بزووتنەوەی حەماس دەستبەرداری چەکەکانی نەبێت و سەرجەم بارمتەکان ئازاد نەکات، هەروەها جەختی کردەوە کە کۆتاییهێنان بە جەنگ دەبێت بەپێی مەرجەکانی ئیسرائیل بێت.

چیرۆکی سەرەکی: بۆ دەستگرتن بەسەر غەززەدا سوپای ئیسرائیل 60 هەزار سەربازی بانگکردووەتەوە و خۆیان ئامادە دەکەن بۆئەوەی بەتەواوەتی کەرتی غەززە کۆنتڕۆڵ بکەن.

بڵاوکراوەی فەرمی: یسرائیل کاتز، وەزیری بەرگری ئیسرائیل، لە پۆستێکدا لە تۆڕی کۆمەڵایەتی ئێکس نووسیویەتی، بەمزووانە، دەروازەکانی دۆزەخ بەڕووی بکوژان و دەستدرێژکارانی حەماسدا دەکرێنەوە تاوەکو بە مەرجەکانی ئیسرائیل بۆ کۆتاییهێنان بە جەنگ ڕازی دەبن، کە بریتییە لە ئازادکردنی هەموو بارمتەکان و دەستبەرداربوون لە چەک.

زانیاریی زیاتر: وەزیری بەرگری ئیسرائیل وتیشی، ئەگەر حەماس ڕازی نەبن، شاری غەززە چارەنووسی ڕەفەح و بەیت حانوونی دەبێت، کە بە شێوەیەکی بەرفراوان وێران کران.

لەلایەکی دیکەوە: بنیامین ناتانیاهۆ ڕۆژی پێنجشەممە ڕایگەیاند، فەرمانی کردووە دەستبەجێ دانوستانەکان بۆ ئازادکردنی بارمتە ئیسرائیلییەکان دەست پێبکەنەوە. جەختیشی کردەوە کە دانوستانەکان هاوکات دەبێت لەگەڵ پلانەکانی سوپا بۆ کۆنترۆڵکردنی شاری غەززە و شکاندنی حەماس.