ڕاگرتنی ئینتەرنێت لە هەرێمی کوردستان دەچێتە بواری جێبەجێکردنەوە

ئاڤا نیوز

بەهۆی بەڕێوەچوونی تاقیکردنەوەکانی خولی دووەمی پۆلی 12ـی ئامادەیی، بۆ ماوەی یەک کاتژمێر ئینتەرنێت لە هەرێمی کوردستان ڕادەگیرێت.

وێنە گەورەکە: ساڵانە لەکاتی بەڕێوەچوونی تاقیکردنەوەکان، وەزارەتی گواستنەوە و گەیاندن، بۆ ماوەیەکی کاتی ئینتەرنێت ڕادەگرێت بەمەبەستی ڕێگریکردن لە گزیکردن لە تاقیکردنەوەکان.

ڕاگەیێنراوی فەرمی: وەزارەتی گواستنەوە و گەیاندنی حکومەتی هەرێمی کوردستان، ڕایگەیاندن: وەزارەتی پەروەردە نووسراوی فەرمی ئاراستەی وەزارەتمان کردووە و داواکراوە لە ڕۆژانی تاقیکردنەوەکان ئینتەرنێت ڕابگرین ئەمەش لەبەر بەرژەوەندی گشتی و ڕێگریکردن لە دیاردەی گزیکردن (غش) لە تاقیکردنەوەکانی خولی دووەم کە ئەمڕۆ شەممە 23-8-2025، دەستپێدەکات و تا بەرواری 8-9-2025، بەردەوام دەبێت.

زانیاریی زیاتر: تەنها لە ڕۆژانی تاقیکردنەوەکان هێڵەکانی ئینتەرنێت و هەموو جۆرە نامەیەک ڕادەگیرێت، لە کاتژمێر 6:30ـی بەیانی تاوەکو7:45ـی  بەیانی، واتا ڕاگرتنی ئینتەرنێت ڕۆژ نا ڕۆژێک دەبێت.

ئەوەی پێویستە بیزانیت: ئەو شوێنانەی کە دیاریکراون کە پێویستە لە هەموو حاڵەتێکدا ئینتەرنێتیان هەبێت، بە هەمان میکانیزمی پێشوو بێت و ئینتەرنێتیان بەردەوام دەبێت.