نەتەوە یەکگرتووەکان بەفەرمی برسییەتی لە غەززە ڕادەگەینێت

ئاڤا نیوز

دۆخی مرۆیی کەرتی غەززە کارەستابارە و سەرەڕای چڕبوونەوەی هەوڵەکان بۆ ڕاگرتنی شەڕ لە کەرتەکە هێشتان ئۆپەراسیۆنەکانی ئیسرائیل بەردەوامن، بۆ یەکەمجار لە دوای سەرهەڵدانی شەڕ غەززەوە، نەتەوە یەکگرتووەکان بە فەرمی برسییەتی لە کەرتەکە ئاشکرا دەکات.

چیڕۆکی سەرەکی: لە مانگی ئازارەوە ئیسرائیل ڕێگریی لە چوونەژوورەوی هاوکارییە مرۆییەکان کردووە سەرەڕای فشارە نێودەوڵەتییەکان هێشتان ئیسرائیل ڕێگریی لە چوونەژوورەوی هاوکارییەکان بۆ ناو کەرتەکە دەکات و ئۆپەراسیۆنەکانی فراوانتر دەکات، تاوەکو ئێستا تەنیا چەند بڕێکی کەمی هاوکاریی گەیشتووەتە دانیشتووانی کەرتی غەززە.

ڕاگەیێنراوی فەرمی: ڕێکخراوانی سەر بە نەتەوە یەکگرتووەکان بەیاننامەیەکی هاوبەشیان لە جنێڤ بڵاوکردەوە و پشتڕاستیان کردەوە، ''زیاتر لە نیو ملیۆن کەس لە غەززە لە برسێتیدا گیریان خواردووە. ئاماژە بەوەش دەکات شاری غەززە و ناوچەکانی دەوروبەری بە فەرمی تووشی برسێتی دەبن کە ئەگەری بڵاوبوونەوەی هەیە'.

زانیاریی بەدەستهاتوو: بەگوێرەی هەڵسەنگاندنەکان، نزیکەی 514 هەزار کەس کە نزیکەی چارەکێکی دانیشتووانی کەرتی غەززە بەدەست برسێتیەوە دەناڵێنن و پێشبینی دەکرێت تا کۆتایی مانگی ئەیلوول ژمارەکە بۆ 641 هەزار کەس بەرزبێتەوە.

بەتەنیشت ئەم بابەتەوە: ئەنتۆنیۆ گۆتێرێس سکرتێری گشتی نەتەوە یەکگرتووەکان لە بەیاننامەیەکدا ڕایگەیاند، برسێتی "کارەساتێکی دروستکراوی مرۆڤە،'' داوای ئاگربەستێکی دەستبەجێ لە غەززە دەکات