بەرپرسێکی ئیسرائیل: حەماس هێشتا  20 هەزار چەکداری هەیە

ئاڤا نیوز

بەرپرسێکی ئیسرائیلی ئاشکرای دەکات، سەڕەرای هێرشە بەردەوامەکانی ئیسرائیل بۆ لە ناوبردنی بزووتنەوەی حەماس، بەڵام تاوەکو ئێستا بزووتنەوەکە زیاتر لە 20 هەزار چەکداری هەیە.

زانیاریی بەدەستهاتوو: گۆڤاری 'زە ئەتڵەنتیک' لە زاری بەرپرسێکی ئیسرائیلییەوە بڵاویکردەوە، بزووتنەوەی حەماس هێشتا 20 هەزار چەکداری هەیە، هەروەها ناتوانرێت پێشبینی قەبارەی چەک و تەقەمەنییەکانی لە کەناری ڕۆژئاوا  بکرێت.

ئەمەش بزانە: ئەم ژمارەیە لە کاتێکدایە کە ئامانجی سەرەکی ئیسرائیل لە بەردەوامی دان بە شەری غەززە، لە ناوبردنی تەواوەتی بزووتنەوەی حەماس و ئازاد کردنی بارمتەکانە، بەڵام تاوەکو ئێستا نەیتوانیوە بەو ئامانجە بگات و بەپێی میدیا ئیسرائیلییەکان بێت %83 قوربانیانی جەنگ خەڵکی سڤیلن و چەکدارانی حەماس نین. 

لەلایەکی دیکەوە: ڕۆژنامەی ئەتڵەنتیک لە زاری نەمرود شیفەری، فەرماندەی پێشووی هێزی ئاسمانی ئیسرائیل ڕایگەیاند، کە ستراتیژی بەردەوام بوون لە شەری  غەززە تەنیا خزمەت بە  بنیامین نەتانیاهۆ،  سەرۆکوەزیرانی ئیسرائیل و هاوپەیمانییەتییەکەی دەکات  و خزمەت بە کەسی دیکە ناکات".