ئاسایشی دهۆک: ئەو کەسەی هەڕەشەی کوشتنی لە ستافی ئاڤا بەهدینان کردبوو دەستگیرکرا

ئاڤا نیوز

ئاسایشی دهۆک بە ئاڤای ڕاگەیاند: ئەو کەسەی چەند ڕۆژێک بەر لە ئێستا هەڕەشەی کوشتنی لە ستافی ئاڤا بەهدینان کردبوو دەستگیرکرا.

چیرۆکی سەرەکی: ڕۆژی چوارشەممە 20-8-2025، ستافی ئاڤا بەهدینان کە لە پەیامنێرمان شەرمین سەلمان و ڕێبەر تەمەری کامێرامان پێکهاتبوون، لەکاتی بەدواداچوون بۆ ئاشكرا کردنی کەیسی ساغکردنەوەی مریشکی ماوەبەسەرچوو و دووبارە خستنەوە بازاڕی، لەسەر شەقامێکی سەرەکی ناحیەی زێلکان لە سنووری قەزای شێخان کەسێک هێرش دەکاتە سەریان و هەڕەشەی کوشتنیان لێدەکات. 

بڵاوکراوەی فەرمی: بەڕێوەبەرایەتیی ئاسایشی دهۆک ڕایگەیاند: چەند ڕۆژێک بەر لە ئێستا ئاسایشی سەر بە بەڕێوەبەرایەتییەکەمان دەستیان بەسەر کۆگایەکدا گرت کە مریشکی بەستووی ماوەبەسەرچووی تێدا هەڵگیرابوو، ئەمەش بەمەبەستی دووبارە گۆڕینی کیس و بەروارەکانیان، تاوەکو لە بازاڕدا ساغی بکەنەوە.

لەدوای ئەوەی ستافی ئاڤا بەهدینان مۆڵەت وەردەگرن بۆ چوونە ئەو شوێنە تاوەکو ڕوماڵی ئەو کەیسە بکەن، کەسێک دێت لەبەردەم کامێرا هەڕەشەی کوشتن لە پەیامنێر و کامێرامانی ئەو کەناڵە دەکات.

ئێستا ئەو کەسە لەلایەن کارمەندانی ئاسایشی دهۆکەوە دەستگیرکراوە و بەگوێرەی ئەو ماددەی لەسەری دەستگیر کراوە، پەڕاوی لێکوڵێنەوەی بۆ کراوەتەوە. 

ئەوەی پێویستە بیزانیت: ستافی ئاڤا بەهدینان پیشەییانە و وەکو ئەرکێکی ڕۆژنامەوانی بەدواداچوون بۆ کێشە و کەموکوڕییەکانی سنووری بادینان دەکات، تاوەکو ئێستاش چەندین کەیسی دەرچوون لە یاسای ئاشکرا کردووە و دواتر ڕووبەڕووی دەسەڵاتی دادوەری کراونەتەوە.