ئاڤا میدیا چارەنووسی دەزگای میدیایی زووم ئاشکرا دەکات

ئاڤا نیوز

دەزگای میدیایی زووم کە خاوەندارێتییەکەی دەگەڕێتەوە بۆ لاهوور شێخ جەنگی، سەرۆکی بەرەی گەل ئێستا پەخشی تەلەڤیزیۆنەکەی ڕاگیراوە و کارمەندەکانی چوونەتە ماڵەوە.

چیرۆکی سەرەکی: شەوی پێنجشەممەی ڕابردوو لە سلێمانی چەند هێزێکی ئەمنی هێرشیان کردە سەر هۆتێل لالەزار بە پاساوی دەستگیرکردنی هەریەک لە لاهوور شێخ جەنگی، پۆڵاد شێخ جەنگی و ڕێبوار حامی حاجی غالی. دوای ڕووبەڕووبوونەوە و شەڕێکی چەند کاتژمێری، لە بەرەبەیانی ڕۆژی هەینی دەزگای ئاسایشی هەرێمی کوردستان ڕایگەیاند داواکراوان دەستگیر کران و هۆتێل لالەزاریش کۆنترۆڵ کرا.

ئەوەی پێویستە بیزانیت: بە هۆی شەڕ و ئاڵۆزییەکانەوە دەزگای میدیایی زووم، کە خاوەندارێتییەکەی دەگەڕێتەوە بۆ لاهوور شێخ جەنگی پەخشی تەلەڤیزیۆنەکەی ڕاگیرا و لە سۆشیاڵ میدیاکانیشیان هیچ بڵاکراوەیەکیان نەما.

لێدوانی فەرمی: بەڕێوەبەری یەکێک لە بەشەکانی دەزگای میدیایی زووم بە ئاڤا میدیای ڕاگەیاند، دوای شەڕەکەی لالەزار هێزێکی دژەتیرۆری یەکێتی هەڵیانکوتاوەتە سەر دەزگاکە و چەند کەلوپەلێکیان بردووە، بەڵام لە ماوەیەکی کەمدا و دوای پەیوەندییەکی تەلەفۆنیی قوباد تاڵەبانی کەلوپەلەکانیان گەڕاندووەتەوە بۆ دەزگاکە و بارەگای دەزگاکەیان جێهێشتووە.

زانیاریی زیاتر: سەبارەت بە دەنگۆی بێسەروشوێنبوونی پەیامنێرێکیان، ئەو بەڕێوەبەرەی زووم گوتی، پەیامنێرێکیان شەوی ڕووداوەکە لەلایەن هێزە ئەمنییەکانەوە دەستگیر کراوە، بەڵام دواتر هەر ئەو شەوە ئازاد کراوە، ئێستاش هیچ هێزێکی ئەمنی لە دەزگاکەیان نییە و دەرگای بارەگای دەزگاکەیان لەلایەن خۆیانەوە کلیل دراوە و ئەگەر مەبەستیان بێت دەتوانن هاتووچۆی دەزگاکە بکەن.

کاریگەری و لێکەوتەکان: سەبارەت بە چارەنووسی کەناڵەکە و دەستپێکردنەوەی پەخش و گەڕانەوەی کارمەندانی دەزگاکە بۆ سەر کارەکانیان، بەڕێوەبەرەکەی دەزگای میدیایی زووم ڕایگەیاند، تا ئێستا ڕوون نییە چارەنووسی دەزگاکە و کارمەندەکان چی بەسەر دێت، بەڵام قوباد تاڵەبانی لەگەڵ بەڕێوەبەری گشتیی دەزگاکە قسەی کردووە و بەڵێنی پێداوە کە ناهێڵێت دەزگای میدیایی زووم و یانەی وەرزشیی نەورۆز تێکەڵی کێشە و ململانێ سیاسییەکان ببێت.