ئاڤا زەرەر و زیانە مادییەکانی شەڕەکەی لالەزار ئاشکرا دەکات

ئاڤا نیوز

شەڕەكەی سلێمانی كە لە نێوان هێزەكانی كۆماندۆ و دژەتیرۆر و ئاسایشی سلێمانی لەبەرەیەك و هێزی دووپشك كە هێزەكەی لاهوور شێخ جەنگییە لەمبەر، وێڕای زیانی زۆری گیانی، زیانی گەورەی داراییشی لێكەوتەوە.

چیرۆکی سەرەکی: بەرەبەیانی ڕۆژی هەینی 2025-08-22، هێزێکی زۆی ئەمنی سلێمانی بەمەبەستی دەستگیرکردنی لاهوور شێخ جەنگی، سەرۆکی بەرەی گەل، هێرشیان کردە سەر هۆتێل لالەزار و شوێنی حەوانەوەی ناوبراو، دوای شەڕێکی قورس کە جۆرەها چەکی قورسی تێدا بەکارهات و  نزیکەی چوار کاتژمێری خایاند، خۆیی و دوو برایی و خوشکێکی دەستگیرکران و چەند کەسێکیش کوژران و بریندار بوون.

زیانە سەرەکییەکان: جگە لە هۆتێلی لالەزار و خانوو و باڵەخانەكانی دەوروبەری، زیانێکی گەورە بەر كۆشكێکی نزیک شوێنی ڕووداوەکە كەوت كە هی وەبەرهێنەرێكی سلێمانییە، ئەم كۆشكە هەر ئەوە نییە كە جێگەی فیشەكی چەكی سووك و بیكەیسی و ئاڕ پی جی پێوەبێت، بەڵكوو شوێنی گوللە تۆپی پێوەیە، زۆرترین گووللە و مووشەك ئاراستەی ئەم کۆشکە کرا كە زیانی دەیان هەزار دۆلار دەخەمڵێندرێت.

لەلایەکی دیکەوە: زیان بە خانوو و ئۆتۆمبێلی چوار گەڕەكی سلێمانی كە دەكەونە دەوروبەری لالەزار كەوتوون، سەرچنار، كانی كوردە، قڵیاسان و میران سیتی، دەیان خانوو لەم چوار گەڕەكە كە ژمارەكە بەپێی خەمڵاندنە سەرەتاییەكان نزیكەی 100 خانووە زیانیان پێگەیشتووە، خانووش هەیە گوللە تۆپی دەبابەی بەركەوتوو.

لەهەمان کاتدا: نزیكەی 50 ئۆتۆمبێلێكی هاووڵاتیانیش زیانیان بەركەوتووە، گوللە و پارچەی تەقەمەنی بەر جام و تایە و لاشەی ئۆتۆمبێلەكان كەوتوون ژمارەیەكیشیان سووتاون.

لێدوانی فەرمی: شاهۆ عوسمان، جێگری پارێزگاری سلێمانی سەبارەت بە زیانەكان بە ئاڤای ڕاگەیاند،  چەند تیمێك دەستیان بە گەڕان بەنێو گەڕەكەكان كردووە و دەیانەوێ قەبارەی زیانەكان بزانن، هەر كەسێك زیانی بەركەوتبێت قەرەبوو دەكرێتەوە.