سینۆهە تووشی شێرپەنجە دەبێت

ئاڤا نیوز

ئەکتەری دیاری ئێرانی میهرداد فەلاحەتگەر، کە لە زنجیرە درامای " پێغەمبەر یوسف" ڕۆڵی سینۆهەی پزیشکی بینی، تووشی نەخۆشیی شێرپەنجە بووە.

ببینە و ببیستە: بڵاوبوونەوەی گرتە ڤیدیۆیەکی میهرداد فەلاحەتگەر، سینەماکار و ئەکتەری دیاری ئێران لە تۆڕە کۆمەڵایەتییەکان دەنگدانەوەی لێ دەکەوێتەوە، چونکە لە گرتە ڤیدیۆیەکەدا زۆر بێهێز و لاواز دەردەکەوێت و داوا لە خەڵک دەکات دوعای بۆ بکەن.

ئەوەی پێویستە بیزانیت: لە گرتە ڤیدیۆیەکەدا فەلاحەتگەر بە دەنگێکی نزم قسە دەکات و باس لەوە دەکات کە چەند ساڵێکە تووشی شێرپەنجە بووە و چارەسەری کیمیایی وەردەگرێت، تا ئێستاش 32 جار دەرمانی کیمیایی وەرگرتووە، بەڵام هێشتا نەخۆشییەکەی چارەسەر نەکراوە.

زانیاریی زیاتر: میهرداد فەلاحەتگەر درێژە بە قسەکانی دەدات و دەڵێت، بۆ چاندنی ددان سەردانی پزیشکی کردووە، بەڵام دەرکەوتووە تووشی شێرپەنجە بووە و لەگەڵ هاوسەرەکەیدا سەردانی تارانیان کردووە بۆ وەرگرتنی چارەسەری پێویست، لە کۆتاییشدا داوا لە خەڵک دەکات دوعای بۆ بکەن بۆ ئەوەی تەندروستیی باش بێت.