زانیاری نەبیستراو لەبارەی دەستگیرکردنی لاهوور شێخ جەنگی؛ چۆن خۆیان ڕادەست کرد؟

ئاڤا نیوز

لاهوور شێخ جەنگی و پۆڵادی برای، دوای ڕووبەڕووبوونەوەیەکی چەند کاتژمێری و بە نێوەندگیریی خوشکێکیان، خۆیان ڕادەستی هێزە ئەمنییەکان کرد.

چیرۆکی سەرەکی: بەرەبەیانی ڕۆژی هەینی، هێزێکی گەورەی ئەمنیی یەکێتیی نیشتمانیی کوردستان بە بەشداریی زیاتر لە 10 هەزار چەکدار و بە بەکارهێنانی تانک، تۆپ، دەبابە و درۆن، لە چەند قۆڵێکەوە هێرشیان کردە سەر ناوچەی لالەزار لە سلێمانی کە شوێنی نیشتەجێبوونی لاهوور شێخ جەنگییە.

هێزەکانی لاهوور شێخ جەنگی، کە ژمارەیان نزیکەی 400 چەکدار بوو، بۆ ماوەی سێ کاتژمێر بەرگرییان کرد. لە ئەنجامی شەڕ و پێکدادانەکاندا کە تا بەرەبەیان بەردەوام بوو، زیاتر لە 20 چەکداری لایەنی شێخ جەنگی کوژران و بەهۆی سەختیی هێرشەکەوە تەرمی هەندێکیان سووتان.

بەرگری لە دوو بەرەوە دەکرا:

بەرەی ڕێگەی سەرچنار: ئەم قۆڵە لەلایەن ڕێبوار حامی حاجی غالییەوە سەرپەرشتی دەکرا. دوای بەرگرییەکی زۆر و بەهۆی ناهاوسەنگیی هێزەوە، ڕێبوار حامی کە بریندار ببوو، ناچار بە خۆڕادەستکردن بوو.

بەرەی سەرگردی سەرچنار: ئەم قۆڵە لەلایەن خودی لاهوور شێخ جەنگی و پۆڵادی برایەوە سەرپەرشتی دەکرا.

چی ڕوویدا: دوای تێکشکانی بەرەی یەکەم، ئاوات شێخ جەنگی، خوشکی لاهوور و پۆڵاد، بۆ ڕێگریکردن لە خوێنڕشتنی زیاتر، ڕۆڵی نێوەندگیریی بینی. ناوبراو چووه‌ دەرەوە و داوای وەهاب هەڵەبجەیی، فەرماندەی دژە تیرۆری کرد.

زانیاریی زیاتر: ئاوات داوای لە وەهاب هەڵەبجەیی کرد کە گەرەنتیی پاراستنی گیانی براکانی بداتێ و بەبێ ئەوەی سووکایەتییان پێبکرێت، دەستگیر بکرێن. دوای وەرگرتنی بەڵێن، وەهاب هەڵەبجەیی و چەند فەرماندەیەکی تر چوونە ژوورەوە.

لە کاتی ڕووبەڕووبوونەوەدا، پۆڵاد شێخ جەنگی کە بریندار بوو، دەمەقاڵێی لەگەڵ وەهاب هەڵەبجەییدا دروست بوو.

لە کاتی هێنانە دەرەوەی لاهوور شێخ جەنگی، وەهاب هەڵەبجەیی دەستی خستە ملی بۆ ئەوەی لە هەر جۆرە سوکایەتی پێکردنێک بیپارێزێت. دواتر، لاهور شێخ جەنگی و پۆڵادی برای بۆ دەباشان گواسترانەوە.