هۆتێلێکی نوێ لە سلێمانی بەهۆی "شەڕی لالەزار"ـەوە پێنج ملیۆن دۆلار زیانی بەرکەوت

ئاڤا نیوز

لەمیانی ڕووبەڕووبوونەوەکانی "شەڕی لالەزار" لە سلێمانی، هۆتێلێکی تەواونەکراو کە هێشتا ناوی لێنەنرابوو، بەهۆی تۆپباران و تەقەیەکی چڕەوە زیانێکی گەورەی بەرکەوتووە کە بە پێنج ملیۆن دۆلار دەخەمڵێندرێت. خاوەنی هۆتێلەکەش داوای قەرەبووکردنەوە دەکات و چارەنووسی 15 کرێکاری عەرەبیش کە لەو شەوەدا لە هوتێلەکە دەستگیرکراون، نادیارە.

چیرۆکی سەرەکی: لەکاتی شەڕ و ڕووبەرووبوونەوەکانی لالەزار، هێزە ئەمنییەکانی یەکێتی بەهۆی بوونی هێزەکانی دووپشک لەسەر بان، هوتێلێکی تەواونەکراو بۆردوومان دەکەن و زەرەر و زیانێکی زۆری لێدەدەن.

لێدوانی فەرمی: عومەر ئۆسکار، وەبەرهێنەر و خاوەنی هۆتێلەکە، بە ئاڤای ڕایگەیاند: بەهای گشتیی پڕۆژەکەی بە نزیکەی 25 ملیۆن دۆلار مەزەندە دەکرێت و تا ئێستا 15 ملیۆن دۆلاری تێدا خەرج کردووە. بە گوتەی ئەو، زیانە بەرکەوتووەکان بە نزیکەی پێنج ملیۆن دۆلار دەخەمڵێنرێت، بەتایبەتی کە تێچووی ئەو بەردەی لە ڕوکاری باڵەخانەکەدا بەکارهاتووە، زیاتر لە سێ ملیۆن دۆلارە و لە ئێران و وڵاتانی دراوسێوە هاوردە کراوە.

زانیاریی زیاتر: عومەر ئۆسکار ئاماژەی بەوەدا کە لە شەوی ڕووداوەکەدا، هێزەکانی لاهوور شێخ جەنگی بەبێ ئاگاداری و ڕەزامەندیی ئەو، چوونەتە سەر باڵەخانەی هۆتێلەکەی و لەوێوە ڕووبەڕووی هێزە ئەمنییەکان بوونەتەوە. ئەمەش بووەتە هۆی ئەوەی هێزە ئەمنییەکان بە چڕی هۆتێلەکە بکەنە ئامانج، وەک خاوەنەکەی دەیگێڕێتەوە، کارمەندێکی هێزە ئەمنییەکان پێی وتووە: "وامانزانیوە ئەم باڵەخانەیە هی لاهوورە، بۆیە دوای شەڕەکەش هەر بۆ خۆشی تەقەمان لێدەکرد."

بەهۆی زۆریی گوللە تۆپ و فیشەکەوە، باڵەخانەکە ئێستا کەڵکی بەکارهێنانی نەماوە و پێویستە بە تەواوی بڕوخێندرێت و سەرلەنوێ دروست بکرێتەوە.

بە گوتەی خاوەنەکەی، جێگری پارێزگاری سلێمانی، سەردانی کردووە و پێی ڕاگەیاندووە کە بافڵ تاڵەبانی بەڵێنی داوە "دینار بە دینار"ـی زیانەکانی بۆ قەرەبوو بکاتەوە. خاوەنی هۆتێلەکە هیواخوازە ئەم بەڵێنە جێبەجێ بکرێت، ئەگەرنا "تاقەتی چاککردنەوەی نییە و بەو شێوەیە بەجێی دەهێڵێت."

لەلایەکی دیکەوە: لە شەوی ڕووداوەکەدا 15 کرێکاری عەرەب کە لە هۆتێلەکەدا کاریان دەکرد، لەلایەن هێزە ئەمنییەکانەوە دەستگیر کراون و تا ئێستا چارەنووسیان نادیارە. عومەر ئۆسکار دەڵێت، "کەسوکارەکانیان بەردەوام پەیوەندیم پێوە دەکەن و منیش داوا لە کاک بافڵ دەکەم کە ئازاد بکرێن."