فایلی خەلك؛ مۆلیدەی شووقەکانی ئیسکان هاووڵاتیانی هەراسان کردووە

ئاڤا نیوز

هاووڵاتیانی شووقەکانی ئیسکان لە هەولێر نیگەرانن لە دەنگی مۆلیدەی سیتییەکەیان دەکەن و دەڵێن ژیانیان لێ تاڵ بووە.

چیرۆکی سەرەکی: سەرەڕای دابینکردنی کارەبای 24 کاتژمێری بۆ زۆربەی ناوچەکانی هەولێر، بەڵام بەشێک لە سیتییەکان و پڕۆژەکانی نیشتەجێبوون هێشتا بە تەواوی لەو پڕۆژەیە سوودمەند نەبوون و لە کاتی پچڕانی کارەبای نیشتمانیدا، ناچارن پشت بە مۆلیدە ببەستن.

لێدوانی فەرمی: ئەکرەم ئەحمەد، یاریدەدەری پارێزگاری هەولێر و سەرپەرشتیاری دۆسیەی سیتییەکان، بە ئاڤای ڕایگەیاند، ئاگاداری کێشەی مۆلیدەی شووقەکانی ئیسکانن و پێشتریش چەندین جار لیژنەیان بۆ چارەسەرکردنی ئەو کێشەیە ناردووە. بە گوتەی ناوبراو، خاوەنی شووقەکان بەڵێنی چارەسەرکردنی کێشەکەی دابوو، بەڵام ئەگەر هێشتا دووکەڵ و دەنگی بەرز مابێت، ئەوا لیژنەی تری بۆ دەنێرن و بە دڵنیاییەوە سزا دەدرێت.

زانیاریی زیاتر: یاریدەدەری پارێزگاری هەولێر هەروەها گوتی: "بەڕێوەبەری کارەبای هەولێر و پارێزگاری هەولێریشم لە کێشەکە ئاگادار کردووەتەوە و هەوڵەکان بەردەوامن بۆ دۆزینەوەی چارەسەرێکی بنەڕەتی بۆ ئەم مۆلیدەیە، چونکە خەڵکی ناوچەکەی بەڕاستی هەراسان کردووە."