زێلینسکی: پلانی گەرەنتی ئاسایشی ئۆکراینا لە چەند ڕۆژی داهاتوودا ڕادەگەیێنرێت

ئاڤا نیوز

سەرۆکی ئۆکراینا لە پەیوەندییەکی تەلەفۆنیدا لەگەڵ سەرۆکوەزیرانی هۆڵەندا کۆتایهاتنی ئامادەکارییەکان بۆ پلانی گەرەنتی ئاسایشی وڵاتەکەی لە چەند ڕۆژی داهاتوودا ڕادەگەیەنێت.

وێنە گەورەکە: لە چوارچێوەی هەوڵە دیپلۆماسییە چڕەکانی کیێڤ بۆ کۆتاییهێنان بە جەنگی ڕووسیا و دابینکردنی ئاسایشی درێژخایەنی ئۆکراینا، هەریەک لە وەزارەتی دەرەوەی ئۆکراینا و ئەمریکا و وڵاتانی ئەورووپا ئامادەکارییەکانیان بۆ داڕشتنی پلانێکی ورد بۆ گەرەنتی ئاسایش و سەقامگیری ئۆکراینا دەستپێکردووە.

بڵاوکراوەی فەرمی: ڤۆلۆدیمێر زێلینسکی، سەرۆکی ئۆکراینا دوای پەیوەندییەکی تەلەفۆنی لەگەڵ دیک شۆوف، سەرۆکوەزیرانی هۆڵەندا لە ئەکاونتی تایبەتی خۆی لە پلاتفۆرمی ئێکس ڕایگەیاند: تیمەکانی ئۆکراینا، ئەمریکا و هاوبەشە ئەوروپییەکان لە ئێستادا کار لەسەر داڕشتنی وردەکارییەکانی پلانی گەرەنتی ئاسایشی ئۆکراینا دەکەن، بەشداریکردنی زیاتری هۆڵەندا و پڕۆژەی هاوبەشی وەبەرهێنان لە پیشەسازیی بەرگریی ئۆکراینا بەشێک دەبێت لە پلانەکە و لە چەند ڕۆژی داهاتوودا داڕشتنی بەندەکانی پلانەکە کۆتایی دێت و ڕادەگەیێنرێت.

زانیاریی زیاتر: هەرچەندە وردەکارییەکانی کۆتایی هێشتا لەژێر گفتوگۆدان، بەڵام چەند لایەنێکی سەرەکیی پلانەکە دەرکەوتوون و بە پێی لێدوانێکی ڤۆلۆدیمێر زێلینسکی، سەرۆکی ئۆکراینا لە کاتی پێشوازی لە مارک ڕوتە، ئەمینداری گشتی هاوپەیمانی ناتۆ ڕایگەیاند: ئۆکراینا بەدوای گەرەنتییەکدا دەگەڕێت کە لە ناوەڕۆکدا هاوشێوەی بەندی پێنجی پەیمانی ناتۆ بێت، کە هێرشکردنە سەر یەکێک لە ئەندامان بە هێرشکردنە سەر هەمووان دادەنرێت.

بۆچی گرنگە: بە جێبەجێکردنی پلانی گەرەنتی ئاسایشی ئۆکراینا هاوسەنگی هێز لە جەنگی نێوان ڕووسیا و ئۆکراینا گۆڕانکاری بەسەردا دێت و کیێڤ پشتیوانییەکی گەورەی سەربازی ئەوروپا بەدەست دەهێنێت، بە جێبەجێکردنی داواکەی زێلینسکی هەموو دەوڵەتانی بەشدار لە پلانەکە پابەند دەبن بە پارێزگاریکردن لە ئۆکراینا لە کاتی هەر هێرشێکی سەربازیدا.