شاندی هەرێمی کوردستان لەگەڵ لیژنەکانی وەزارەت لە بەغدا کۆدەبنەوە

ئاڤا نیوز

شاندێکی هەرێمی کوردستان  لە بەغدان، بڕیارە لەگەڵ لیژنەکانی وەزارەت لە ئەنجوومەنی وەزیرانی عێراق کۆببنەوە و هەڵوەستە لەسەر مووچە، داهاتی نانەوتی و  پرسی هەناردەکردنەوەی نەوت دەکەن.

چیرۆکی سەرەکی: ئەنجوومەنی وەزیرانی عێراق بڕیاری خەرجکردنی مووچەی مانگی شەشی فەرمانبەرانی هەرێمی کوردستانی داوە، بەڵام تا ئێستا بڕیارەکە نەچووەتە بواری جێبەجێکردنەوە، بۆ ئەم مەبەستەش شاندێکی هەرێمی کوردستان لە بەغدان.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "بڕیارە پێشنیوەڕۆی ئەمڕۆ شاندی هەرێمی کوردستان لەگەڵ لیژنەکانی وەزارەت کۆببنەوە، پرسی ناردنی مووچە، هەناردەکردنەوەی نەوت و چۆنیەتی ڕادەستکردنی داهاتی نانەوتی پرسی سەرەکی کۆبوونەوەکانیان دەبن."

لەلایەکی دیکەوە: بەرپرسێکی باڵای حکومەتی عێراق بە ئاڤای ڕایگەیاند، "ئەگەر حکومەتی هەرێمی کوردستان مەرجەکان جێبەجێ بکات، ئەوا ڕۆژی سێشەممەی داهاتوو بڕیاری ناردنی پارەکە دەدرێت و لە ڕۆژانی چوارشەممە یان پێنجشەممەدا مووچەکە دەنێردرێت."

ئەمەش بزانە: حکومەتی هەرێمی کوردستان 120 ملیار دینار داهاتی نانەوتی بۆ مانگی شەش ئامادەکردووە، دوای گەیشتن بە لێکتێگەیشتنی ئەرێنی دەرێتە سەر هەژماری بانکی وەزارەتی دارایی عێراق.