هاوسەری لاهوور شێخ جەنگی ورده‌كاریی هێرشه‌كه‌ی لالەزار ئاشكرا ده‌كات

ئاڤا نیوز

گەشە حەمە چاوشین، هاوسەری لاهوور شێخ جەنگی، باس لە هێرشەکەی سەر لالەزار و ماڵەکەیان دەکات و دەڵێت، "ماڵەکەیان بە زیاتر لە 100 درۆن کراوەتە ئامانج و وێرانکارییەکی زۆری لێ کەوتووەتەوە".

 

چیرۆکی سەرەکی: بەرەبەیانیی ڕۆژی هەینی هێزێکی زۆری ئەمنیی یەکێتی بە چەکی قورسەوە هێرشیان کردە سەر هۆتێل لالەزار و شوێنی مانەوەی لاهوور شێخ جەنگی، سەرۆکی بەرەی گەل، دوای شەڕێکی سێ کاتژمێری ناوبراو و پۆڵاد شێخ جەنگی برای دەستگیر کران.

لێدوانی فەرمی: گەشە حەمە چاوشین ڕایگەیاند، کە لە هەشتی تەممووزەوە بەردەوام هەڕەشەیان لەسەر بووە و سەدان هێزی ئەمنی لە بەردەم ماڵەکەیان جێگیر کرابوون. ئەو دەڵێت، "شەوی وا هەبووە بافڵ تاڵەبانی، سەرۆکی یەکێتیی نیشتمانیی کوردستان هاتووەتە بەردەم ماڵەکەمان بە ئۆتۆمبێلەکەی 'درێفتی' کردووە."

هاوسەری لاهوور شێخ جەنگی باس لەوە دەکات کە هێرشەکەی بەرەبەیانیی ڕۆژی هەینی سەر لالەزار مەبەست لێی تەنها وێرانکاری بووە. "بە زیاتر لە 100 درۆن هێرش کراوەتە سەر ماڵەکەمان و مەبەستەکەش تەنیا بۆ وێرانکاری بووە و هیچی تر نەبووە." ئەو خانووەی کە تێیدا نیشتەجێ بوون، وەک هاوسەرەکەی سەرۆکی بەرەی گەل دەڵێت، موڵکی دایک و باوکی خۆی بووە و وەک شوێنی حەوانەوەیان بەکاریان هێناوە کاتێک لە کوردستان بوون.

ئەو دەڵێت، وێرانکارییەکە تەنها ماڵی خۆیانی نەگرتووەتەوە، بەڵکو هێزەکانی یەکێتی چوونەتە سەر ماڵی باوکیشی و دەستکاری ئەو کەلوپەلانەیان کردووە کە "ماوەی سی ساڵە پاراستوومانە."

 

ئەوەی پێویستە بیزانیت: خاتوو گەشە ئاماژەی بە کاریگەریی دەروونیی ڕووداوەکە کرد لەسەر منداڵەکانیان. یەکێک لەو دیمەنە کاریگەرانە، بینینی ژووری نوستنەکەی "دیانا"ی کچیان بووە لەلایەن خۆیەوە. کاتێک کچەکەی وێنەی ژوورەکەی بینیوە، گریاوە و وتوویەتی، "دایکە، بۆچی وایان لە ژوورەکەم کردووە؟"

ئەمەش بزانە: لاهوور شێخ جەنگی و گەشە حەمە چاوشین خاوەنی سێ منداڵن: دوو کوڕ بە ناوەکانی داریۆس و دیاکۆ، لەگەڵ کچە تاقانەکەیان بە ناوی دیانا کە تەمەنی نزیکەی 10 بۆ 11 ساڵە. هەرسێکیان لە قوتابخانەیەکی فەرەنسی لە سلێمانی خوێندوویانە.

پێشتر وێنەی خێزانییان بە بەردەوامی لە تۆڕە کۆمەڵایەتییەکاندا بڵاودەکرایەوە. دوابەدوای ڕووداوەکانیش، هاوسەرەکەی لاهوور شێخ جەنگی وێنەیەکی خێزانیی بڵاو کردەوە و لەسەری نووسیبووی: "لاهوور گیان، هەتاهەتایە لەگەڵت دەبین."