نوێنەری خامنەیی لە عێراق: خەونی هەڵوەشاندنەوەی حەشدی شەعبی بەدی نایەت

ئاڤا نیوز

نوێنەری ڕێبەری باڵای شۆڕشی ئیسلامیی ئێران لە عێراق، جەختی کردەوە کە داواکارییەکانی ئەمریکا بۆ چەککردن یان هەڵوەشاندنەوەی حەشدی شەعبی "هیوا و ئاواتێکن کە هەرگیز بەدی نایەن" و گەلی عێراق بە هیچ شێوەیەک شتێکی وا قبووڵ ناکات.

 

وێنە گەورەکە: لە چەندین بۆنەدا بەرپرسانی عێراقی ئەوەیان نەشاردووەتەوە کە هەڕەشە لەسەر عێراق هەیە بەبۆنەی چالاکیی گرووپە چەکدارەکان و پشتیوانیکردنیان لە حەماس و حیزبوڵڵا و بە ئامانجگرتنی بە بەرژەوەندییەکانی ئەمریکا و ئیسرائیل لە ناوچەکە. لەسەر ئەو بنەمایەش چەند داوایەک بۆ هەڵوەشانەوە و کۆتاییهێنان بەو هێزانە خراوەتە بەردەم دەسەڵاتدارانی عێراق.

 

لێدوانی ڕۆژنامەوانی: ئایەتوڵڵا سەید موجتەبا حوسێنی، لە چاوپێکەوتنێکدا لەگەڵ ئاژانسی فارس نیوز ڕایگەیاند: "بانگەشەکانی ئەمریکا سەبارەت بە چەککردن یان هەڵوەشاندنەوەی حەشدی شەعبی، هیوا و ئاواتێکن کە بەدی نایەن. گەلی عێراق هەرگیز شتێکی لەو شێوەیە قبووڵ ناکات."

 

لەهەمان کاتدا: ناوبراو هۆشداری دا و وتی: "هەمووان دەزانن کە ئەمریکا دەیەوێت هەمان چارەنووسی سووریا بەسەر عێراقدا بهێنێت، بەڵام هیچ بنەمایەک بۆ سیناریۆیەکی لەو شێوەیە نییە و ئەگەر دوژمن هەر زیانێکیان پێ بگەیەنێت، ئەوا خۆی گەورەترین دۆڕاو دەبێت."

 

باکگراوند: دوای سەرهەڵدانی داعش ساڵی 2014 و داگیرکردنی یەک لەسەر سێی عێراق، بە فەتوای عەلی سیستانی مەرجەعی باڵای شیعەکان هێزێکی سەربازی بۆ پاراستنی عێراق پێکهێنرا و ناوی لێنرا حەشدی شەعبی، ئێستا ئەم هێزە 238 هەزار چەکداری هەیە و ساڵانە لە بودجەی دەوڵەت 3.6 مليار دۆلار دەبات، لەژێر چەتری ئەم دامەزراوەیەش، 70 گرووپی چەکداری جیاوازی شیعی کە بەشێکیان لە لیستی سزاکانی ئەمریکادان لەوانەش نوجەبا، عەسایب و حیزبوڵڵا کۆ کراونەتەوە.