خامنەیی: دوای هێرشەکانی ئیسرائیل، ئەوروپییەکان گفتوگۆی ئەوەیان کردبوو کێ دەبێتە پاشای داهاتووی ئێران

ئاڤا نیوز

 

عەلی خامنەیی، ڕێبەری باڵای ئێران، ڕۆژی یەکشەممە ڕایگەیاند، وڵاتەکەی "بە تووندی" لە بەرامبەر داواکارییەکانی ئەمریکا بۆ ئەوەی تاران ببێتە وڵاتێکی "گوێڕایەڵ و ملکەچ"، ڕادەوەستێت.

 

وێنە گەورەکە: ئەمریکا و ئێران بە بەردەوامی پەیوەندییەکی ئاڵۆز و خراپیان هەبووە بەتایبەتی دوای ئەوەی کە ئەمریکا بە هەماهەنگی لەگەڵ ئیسرائیل هێرشی کردە سەر بنکە و ناوەندە ئەتۆمییەکانی ئێران، ئەوە بووە هۆی ئەوەی ئەوەندەی دیکە پەیوەندییە سیاسییەکانیان تێکبچێت.

 

لێدوانی فەرمی: عەلی خامنەیی، ڕێبەری باڵای ئێران ڕایگەیاند، "ئەمریکییەکان دەیانەوێت زاڵ بن بەسەر ئێران و ئامانجیان ئەوەیە ئێرانێکی ملکەچ دروست بکەن".

ئەوەی پێویستە بیزانیت: هەروەها ڕەخنەی لە هەندێک وڵاتی ڕۆژئاوایی گرت و ئاشکرای کرد کە تەنها یەک ڕۆژ دوای "هێرشەکان" بۆ سەر ئێران، لە پایتەختێکی ئەوروپی کۆبوونەتەوە بۆ ئەوەی گفتوگۆ لەسەر جێگرەوەیەک بۆ کۆماری ئیسلامی بکەن.

بە گوتەی خامنەیی، ئەو وڵاتانە "زۆر دڵنیا بوون" لەوەی کە سیستمی کۆماری ئیسلامی دەڕووخێت و تەنانەت باسیان لەوە کردووە کێ دەبێتە پاشای داهاتوو. ناوبراو ئاماژەی بەوەشکرد کە "ئێرانییەکی ناپاکیش" لەو کۆبوونەوەیەدا ئامادە بووە.

 

لەلایەکی دیکەوە: لە کۆتاییدا، ڕێبەری ئێران جەختی کردەوە کە گەلی ئێران، بە پشتیوانیکردنی هێزە چەکدارەکان و حکومەت، "وانەیەکی بەهێزی" پیشانی دوژمنان داوە و پیلانەکانیانی پووچەڵ کردووەتەوە.