گەڕێکی دیکەی ئاڵوگۆڕی دیل لەنێوان ڕووسیا و ئۆکراینا بەڕێوەچوو

ئاڤا نیوز

لە هەنگاوێکی نوێدا، هەریەک لە ڕووسیا و ئۆکراینا ڕایانگەیاند کە 292 دیلی جەنگییان ئاڵوگۆڕ کردووە، ئەمەش بە نێوەندگیری و هەوڵی دیپلۆماسی وڵاتی ئیماراتی یەکگرتووی عەرەبی.

وێنە گەورەکە: وێڕای ئەوەی جەنگی نێوان هەردوو وڵاتەکە بەردەوامە و پێگە ستراتیجییەکانی یەکتر دەکەنە ئامانج، بەڵام ئاڵوگۆری دیلەکانی نێوان ڕووسیا و ئۆکراینا بەردەوامە.

ڕاگەیێنراوی فەرمی: وەزارەتی بەرگریی ڕووسیا  بڵاویکردەوە، "146 سەربازی ڕووسیا لەو خاکەی کە کیێڤ کۆنترۆڵی کردبوو گەڕێنرانەوە و ئاماژەی بەوەشکرد، "لە بەرامبەردا 146 دیلی جەنگی هێزە چەکدارەکانی ئۆکراینا گواستراونەتەوە" بۆ ئۆکراینا.

لەلایەکی دیکەوە: وەزارەتی دەرەوەی ئیمارات لە ڕاگەیێنراوێکدا سەرکەوتنی ئەم هەوڵە نێوەندگیرییەی ڕاگەیاند و سوپاسی هەردوو لایەنی ململانێکەی کرد بۆ هاوکاری و وەڵامدانەوەی ئەرێنییان. جەختی لەوە کردەوە کە ئەم هەنگاوە "نیشانەی متمانەی هەردوو وڵاتە بە ئیمارات وەک نێوەندگیرێکی باوەڕپێکراو".