داواکاری گشتی کوردستان: ئەوەی لە سلێمانی ڕوویدا پێچەوانەی یاسا و مافی مرۆڤە

ئاڤا نیوز

داواکاری گشتی هەرێمی کوردستان، ڕایگەیاند جوڵاندنی هێزێکی زۆر لەناو شاری سلێمانیدا نایاساییە و پێچەوانەی پرەنسیپەکانی مافی مرۆڤە. هاوکات پسپۆڕێکی یاسایی جەخت لەوە دەکاتەوە کە جووڵاندنی هێز بە چەکی قورسەوە تەنیا لە کاتی جەنگ و هەڕەشەی دەرەکیدا ڕێگەپێدراوە.

چیرۆکی سەرەکی: بەرەبایەنی ڕۆژی هەینی، هێزێکی زۆری یەکێتی بە جۆرەها چەکی قورسەوە چواردەوری ماڵی لاهوور شێخ جەنگی، سەرۆکی بەرەی گەلی گرت، شەڕێکی قورس ڕوویدا و  چەندین کەس کوژران و بریندار بوون و بەشێکیش بەهۆی بەهێزی چەکە بەکارهاتووەکان تەرمەکانیان سووتاون و ناناسرێنەوە.

لێدوانی فەرمی: دکتۆر محەمەد ڕێکانی، داواکاری گشتی کوردستان، بە ئاڤای وت، "ئەوەی لە سلێمانی کراوە، پێچەوانەی مافی مرۆڤ و یاسایە." ناوبراو جەختی لەوە کردەوە کە تەنانەت ئەگەر کەسێک تاوانباریش بێت، نابێت هیچ جۆرە بێڕێزییەکی بەرامبەر بکرێت و ئازار و ئەشکەنجە بدرێت.

زانیاریی زیاتر: داواکاری گشتی ئاماژەی بەوەشکرد کە جووڵاندنی ئەو هەموو هێزە بۆ ناو شار کارێکی نایاساییە. لە وەڵامی بانگەشەی یەکێتی نیشتیمانی کوردستان کە گوایە ئەم کارە بۆ سەپاندنی یاسایە، دکتۆر محەمەد وتی: "جێبەجێکردنی یاسا پێوەری خۆی هەیە و نابێت لە چوارچێوەی سنووری خۆی دەربچێت. ئەم ئەرکە لە ئەستۆی دادگایە، نەک لایەنێکی سیاسی یان کەسێک."

لەلایەکی دیکەوە: پڕۆفیسۆر دکتۆر سامان، مامۆستای بەشی یاسا لە زانکۆی سەڵاحەددین، بە ئاڤای ڕاگەیاند: بەپێی یاسا، جووڵاندنی هێز بەو شێوەیە و بە چەکی قورسەوە تەنیا بۆ کاتی جەنگ و بەرەنگاربوونەوەی هەڕەشەی دەرەکی ڕێگەپێدراوە، نەک بۆ یەکلاییکردنەوەی کێشەی ناوخۆیی.