لە شەڕەکەی لالەزار چی بەسەر دەیان گەشتیاری عەرەب هات؟

ئاڤا نیوز

شەڕەکەی هۆتێل لالەزار لە سلێمانی بووەتە هۆی زیانێکی ماددی گەورە بە ژمارەیەک پاسی گەشتیاری و سەدان گەشتیاری عەرەب کە لە ناوەڕاست و باشووری عێراقەوە هاتبوون، لە ئوتێلەکە گیریان خواردووە.

ببینە و ببیستە: بەپێی چەند گرتەیەکی ڤیدیۆیی، دەیان خێزانی عەرەب، کە لەنێویاندا منداڵ و بەساڵاچوو هەبوون و بۆ بەسەربردنی کاتێکی ئارام و دوورکەوتنەوە لە گەرمای شارەکانیان ڕوویان لە هەرێمی کوردستان کردبوو، لە ئوتێلەکاندا گیریان خواردووە.

ئێستا ئەو گەشتیارانە بەهۆی ئەو زیانە زۆرەی بەر پاسەکانیان کەوتووە، نەیانتوانیوە گەشتێکی خۆش بکەن و لە هەمان کاتدا ناتوانن بگەڕێنەوە بۆ ماڵەکانیان.

لێدوانی تایبەت: کەسێکی نزیکی لاهوور شێخ جەنگی، خۆی لە لالەزار ژیاوە و شەوی شەڕەکەش لەوێ بووە، بەڵام دەربازی بووە و نەگیراوە لە کاتی ڕووداوەکەدا بە ئاڤای وت، ژمارەیەکی زۆر گەشتیار لە هۆتێلەکە و دەوروبەری بوونیان هەبووە. شایەتحاڵێک کە لە نزیکەوە ئاگاداری ڕووداوەکە بووە، ئاماژەی بەوە کردووە کە شەوانە دوو بۆ سێ پاسی گەشتیاری کە هەریەکەیان نزیکەی 40 بۆ 50 گەشتیاری هەڵگرتبوو، تەنیا لە هۆتێل لالەزار دەمانەوە. هەروەها جەختی لەوە کردەوە کە شەڕەکە گەیشتووەتە ناو هۆتێلەکەش.

سەرچاوەیەکی دیکە باس لە بوونی دوو پاسی گەشتیاری لەناو هۆتێلەکە دەکات لە شەوی ڕووداوەکەدا. جگە لەمەش، دەیان پاسی دیکەی گەشتیاری لە هۆتێلەکانی دەوروبەر زیانیان بەرکەوتووە.

لەلایەکی دیکەوە: خاوەنی یەکێک لە پاسە زیانلێکەوتووەکان دەڵێت: "دەیان گەشتیارم هێنابوو، بەهۆی شەڕەکەوە پاسەکەم زیانی زۆری بەرکەوتووە و لە کار و کاسبی خۆم بووم. داوا لە لایەنە پەیوەندیدارەکان دەکەم قەرەبووم بکەنەوە تا بتوانم گەشتیارەکان بە سەلامەتی بگەڕێنمەوە و بەردەوام بم لەسەر کارەکەم.

زانیاریی زیاتر: لەبارەی کوژران و برینداربوون و برینداربوونی گەشتیاران دەنگۆ هەیە، بەڵام هیچ سەرچاوەیەکی فەرمی بۆ ئاڤا پشتڕاستی نەکردەوە.