ڕۆژی پێنجشەممە زیاتر لە هەزار فەرمانبەری دیکە لە هەولێر زەوی وەردەگرن

ئاڤا نیوز

بەڕێوەبەرایەتیی گشتیی شارەوانییەکانی هەولێر، ژمارەیەک پارچە زەوی دیکە  لە سنووری قەزای خەبات یان مەخموور دابەش دەکات، زیاتر لە هەزار فەرمانبەر سوودمەند دەبن.

وێنە گەورەکە: هەنگاوەکانی ئامادەکردن و دابەشکردنی زەوی لە سنووری بەڕێوەبەرایەتیی گشتیی شارەوانییەکانی هەولێر خێراتر کراوە، ئامانجەکە ئەوەیە پێش مانگی 10ی ئەمساڵ سەرجەم سوودمەندبووان لە سنووری هەر 35 قەزا و ناحیەکەی هەولێر تیروپشکی وەرگرتنی زەوییان بۆ بکرێت.
 
لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر؛ بە ئاڤای گوت، "لە هەردوو شارەوانی ژمارەیەک پارچە زەوی ئامادە دەکرێت، زەوییەکان لە سنووری ناحیەی ڕزگاری سەر بە قەزای خەبات و سنووری شارەوانی مەخموورە، ڕۆژی پێنجشەممەی داهاتوو لە یەکێک لەو دوو شارەوانییە زەوی دابەش دەکەین."

ئەوەی پێویستە بیزانیت: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، 35 هەزار پارچە زەوی ئامادەکراون و زیاتر لە 10 هەزار و 500 کەس تیروپشکی وەرگرتنی زەوییەکانیان بۆ کراوە.