لە پەرلەمانی عێراق یاسایەک لە بەرژەوەندیی گیراوان و زیندانییانی سیاسیی هەرێمی کوردستان دەرکرا

ئاڤا نیوز

ئەمڕۆ هەمواری یاسای زیندانییە سیاسییەکانی عێراق لە پەرلەمانی عێراق پەسەند کرا، بەگوێرەی هەموارەکەش زیندانییە سیاسییەکانی کوردستان لە هەمان ماف و ئیمتیازاتی زیندانییە سیاسییەکانی عێراق سوودمەند دەبن کە ژمارەیان 25 هەزار و 807 کەسە.

وێنە گەورەکە: بە گواستنەوەی دۆسیەی زیندانیانی سیاسیی هەرێمی کوردستان بۆسەر دەزگای زیندانیانی سیاسی عێراق کۆمەڵێک ماف و ئیمتیازییان پێدەدرێت لەوانەش زیادبوونی مینحە، قەرەبووکردنەوەی ئەو ڕۆژانەی لە زیندانبوون، پێدانی زەوی و پارە بۆ کڕینی یەکەی نیشتەجێبوون و دابینکردنی پارە بۆ چارەسەر یان خوێندن یاخود حەج و عومرە.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق ڕایگەیاند، "بەداخەوە تەنیا لەبەر ئەوەی زیندانی و گیراوانی هەرێمی کوردستان بۆ پرۆژە یاساکە زیاد کرا، لە کۆبوونەوەی ئەمڕۆی پەرلەماندا دیسان هاوشێوەی پرۆژە یاسای بەپارێزگابوونی هەڵەبجە کورسی سەرۆکایەتی چۆڵکرا و بەشێکی زۆریش لەفراکسیۆنەکان هۆڵی پەرلەمانیان جێهێشت، بۆیەش جارێکی دیکە دەسەڵاتی خۆمان بەکارهێنا و پرۆژە یاساکەمان  تێپەڕاند، بەو بۆنەیەش پیرۆزبایی لە زیندانی و گیراوانی هەرێمی کوردستان و سەرجەم عێراق دەکەین".

خاڵە ئەرێنییەکان: ئەو ماف و ئیمتیازاتانەی کە زیندانیانی سیاسیی هەرێمی کوردستان بە گواستنەوەی دۆسییەکانیان سوودمەنددەبن بریتین لە:-

- مینحەی زیندانیانی سیاسی دەبێتە یەک ملیۆن و 200 هەزار دینار.

- پارچەیەک زەوینان پێدەدرێت.

- قەرەبووی ئەو ڕۆژانەیان بۆ دەکرێتەوە کە لەزیندان بوونە.

- بڕێک پارەیان پێدەدرێت بۆ دروست کردنی یەکەی بیشتەجێبوون.

- پێنج ملیۆن دیناریان بۆ یەکێک لەو مەبەستانە بۆ خەرج دەکرێت، 'چارەسەر و خوێندن لە ناوەوە و دەرەوەی وڵات، حەج و عەمرە.

ئەوەی پێویستە بیزانیت: لە یاساکە ڕاستەوخۆ 25 هەزار و 807 کەس سوودمەند دەبن و دۆسیەیان گواستراوەتەوە سەر دەزگای زیندانیانی سیاسی عێراق، 17هەزار و 537 کەسیش  هێشتا ڕێکارەکانی مامەڵەی زیندانی سیاسییان و دۆسیەکانیان تەواو نەبووە، چاوەڕێی پشتڕاستکردنەوەی دۆسیەکانیان دەکرێت، هەر کەسێک دۆسیەکەی پشتڕاست کرایەوە ئەوانیش سوودمەند دەبن.