ترەمپ لەبارەی غەززە کۆبوونەوەیەکی گرنگ دەکات

ئاڤا نیوز

لە کۆشکی سپی کۆبوونەوەیەکی فراوان سەبارەت بە غەززە دەکرێت. پێشتریش سەرۆکی ئەمریکا ئاماژەی بەوە کردبوو کە لە چەند هەفتەی داهاتوودا کۆتایییەکی زۆر باش و یەکلاکەرەوە دەبێت.

وێنە گەورەکە: شەڕی غەززە لە دووەم ساڵی نزیکدەبێتەوە بەڵام تەواوی هەوڵەکان تاوەکو ئێستا دەرئەنجامێکی ئەرێنییان بۆ ڕاگرتنی شەڕەکە نەبووە، نێردەی ئەمریکاش لە نوێترین چاوپێکەوتنیدا ئاماژە بەوە دەکات، ئەمڕۆ چوارشەممە ترەمپ سەرپەرشتی کۆبوونەوەیەک سەبارەت بە غەززە دەکات.

زانیاریی بەدەستهاتوو: ستیڤ ویتکۆف، نێردەی ترەمپ بۆ ڕۆژهەڵاتی ناوەڕاست ڕایگەیاند، دۆناڵد ترەمپ، سەرۆکی ئەمریکا ڕۆژی چوارشەممە لە کۆشکی سپی کۆبوونەوەیەکی فراوان سەبارەت بە غەززە دەکات، دەشڵێت، پێویستە پێش کۆتایی هاتنی ساڵ ئەم شەڕە کۆتایی پێبێت.

زانیاریی زیاتر: پێشتریش ویتکۆف ئاماژەی بەوەکردبوو، هیوادارە تا کۆتایی ئەمساڵ شەڕەکانی ئۆکراینا و غەززە و دانوستانە ئەتۆمییەکان لەگەڵ ئێران چارەسەر بکەن.

ئەوەی لەوبارەیەوە دەگوترێت: ترەمپ ڕۆژانی ڕابردوو باسی لەوەکرد کە لە ماوەی دوو بۆ سێ هەفتەی داهاتوودا، کۆتایییەکی زۆر باش و یەکلاکەرەوە دەبێت سەبارەت بە غەززە.