تەواوی سەنتەری سلێمانی کارەبای 24 کاتژمێری پێ دەگات

ئاڤا نیوز

لە سنووری پارێزگای سلێمانی کارەکانی پرۆژەی ڕووناکی بەردەوامە و وا بڕیارە تا سەرەتای مانگی 10ی ئەمساڵ کارەبای تەواوی سەنتەری شاری سلێمانی ببێتە 24 کاتژمێری.

وێنە گەورەکە: پرۆژەی ڕووناکی، پرۆژەیەکی ستراتیژی کابینەی نۆیەمی حکومەتی هەرێمی کوردستانە، بە ئامانجی دابینکردنی کارەبای 24 کاتژمێری بۆ سەرتاسەری کوردستانە، بەراورد بە پێشتر 80%ی هاونیشتمانیان پارەی کەمتر بە کارەبا دەدەن، تا کۆتایی ساڵی 2026 کارەبای هەموو کوردستان دەبێتە 24 کاتژمێری.

لێدوانی فەرمی: سیروان محەممەد، وتەبێژی بەڕێوەبەرایەتیی گشتیی کارەبای سلێمانی بە ئاڤا میدیای وت: دوا قۆناغی پرۆژەی ڕووناکی 13 زۆنە کە 200 گەڕەک لەخۆدەگرێت و 80%ی کارەکانی تەواو بووە، پێشبینی دەکرێت کۆتایی مانگی ئەیلوول یان سەرەتای مانگی تشرینی یەکەم تەواوی سەنتەری شاری سلێمانی ببێتە کارەبای 24 کاتژمێری.

بۆچی گرنگە: بە تەواو بوونی پرۆژەی ڕووناکی، هاونیشتمانیان بە تێچووی کەمتر کارەبای 24 کاتژمێریان بۆ دابین دەکرێت، هاوکات کارپێکردنی مۆلیدەکان ڕادەگیرێت، ئەمەش کاریگەری ڕاستەوخۆی لەسەر پاکبوونەوەی ژینگەی هەرێمی کوردستان دەبێت.

ژمارەکان وادەڵێن: تا ئێستا کارەبای 24 کاتژمێری بۆ زیاتر لە دوو ملیۆن و 700 هەزار هاونیشتمانی دابینکراوە، بە مجۆرەیە:

هەولێر: یەک ملیۆن 458 هەزار هاونیشتمانی

سلێمانی: 976 هەزار و 500 هاونیشتمانی

دهۆک: 288 هەزار هاونیشتمانی

ئەوەی پێویستە بیزانیت: تا ئێستا پرۆژەی ڕووناکی دوو هەزار و 517 مۆلیدەی لە سەرتاسەری هەرێمی کوردستان کوژاندووەتەوە، دووکەڵی ئەو مۆلیدانە هاوتای 436 هەزار ئۆتۆمبێل بووە لە ڕووی دەردانی دوانەئۆکسیدی کاربۆن.

باکگراوند: لە شەشی مانگی ئازاری ئەمساڵ پرۆژەی ڕووناکی گەیشتە شاری سلێمانی.