د. ڕێبوار هادی: ئەوەی بەرامبەر جووتیارانی کورد دەکرێت نایاساییە

ئاڤا نیوز

ئەمڕۆ بە بڕیاری دادگای خورماتوو 500 دۆنم زەویی کورد دەدرێت بە عەرەبی هاوردە، ئەمەش نیگەرانی جووتیارانی کوردی لێکەوتەوە. ئەندامێکی پەرلەمانی عێراقیش لەوبارەیەوە دەڵێت، ئەوەی بەرامبەر جووتیارانی کورد دەکرێت نایاساییە.

چیرۆکی سەرەکی: بەیانی ئەمڕۆ چوارشەممە 27-8-2025، هێزێکی زۆری سوپای عێراق و پۆلیسی عێراقی لەگەڵ عەرەبی هاوردە چوونەتە سەر گوندی تەپەسەوز لە سنووری قەزای خورماتوو، هەوڵدەدەن بەڵێننامە بە جووتیارانی کورد پڕبکەنەوە بۆ ئەوەی زەوییەکانیان لێوەربگرنەوە و ئەو زەوییانە بە عەرەبی هاوردە بدەن.

لێدوانی فەرمی: د. ڕێبوار هادی، سەرۆکی لیژنەی یاسایی لە پەرلەمانی عێراق، بە ئاڤای وت، کێشەی زەوی لە ناوچە کوردستانییەکانی دەرەوەی ئیدارەی هەرێمی کوردستان لە کۆنەوە هەبووە، ئەمەش پەیوەستە بە کێشەی دەستووری و یاسایی و سیاسی.

- "لەماوەی ڕابردوو لە پەرلەمانی عێراق کارمان لەسەر کردووە، کۆمەڵێک لە بڕیارەکانی مەجلیسی سەورەی ڕژێمی بەعسمان بە یاسا هەڵوەشاندەوە و زەوییەکانمان بۆ خاوەنەکانیان گەڕاندەوە"، یاساکە ئێستا بەرکارە و دەبێت جێبەجێ بکرێت، بەڵام ئەوەی ئێستا جێگەی نیگەرانییە، سوپا تەداخوڵ دەکات و ئەمەش نایاساییە، بە گوێرەی ماددەی نۆی دەستوور، سوپا نابێت تەداخول بکات لەسەرکووتکردنی خەڵکی عێراق لە کێشە سیاسیەکان".

- ئیمە لە هەوڵەکان بەردەوام دەبین بۆ چارەسەرکردنی کێشەی جووتیارانی کورد، ئەوەی ئەمڕۆ ڕووی داوە، نایاساییە و قبوڵکراو نیە، ئەوە داگیرکردنی ماڵ و موڵکی کوردە لە ناوچەکە.

- سوپای عێراق هەڕەشەی دەستگیرکردنی لە جووتیاران کردووە، پێش ئەوەی فەرمانی دادگا دەربچێت ئەمەش نایاساییە و نیگەرانی لێکەوتووەتەوە.