وەزیری تەندروستی: لە ڕۆژانی داهاتوودا دەرچووانی پزیشکی دەستبەکار دەبن

ئاڤا نیوز

سەبارەت بە فەرمانی دامەزراندنی دەرچووانی پزیشکی و ڕێکارەکانی دەستبەکاربوونیان، وەزیری تەندروستی دەڵێت، "لە ڕۆژانی داهاتوو دەستبەکاردەبن".

 

لێدوانی فەرمی: د.سامان بەرزنجی، وەزیری تەندروستیی هەرێمی کوردستان بە ئاڤا میدیای ڕاگەیاند: سەرۆکوەزیران مەسرور بارزانی لە کۆبوونەوەی ئەنجوومەنی وەزیران بڕیاری دامەزراندنی دەرچووانی پزیشکی بۆ ساڵی 2023-2024ی دا.

 

وەزیری تەندروستی وتیشی، هەموو ڕێکارەکانی دامەزراندی دەرچووانی پزیشکی لە ئەنجوومەنی ڕاژە تەواو بووە، ئێستا فەرمانی دامەزراندنیان هەیە و لە ڕۆژانی داهاتوودا دەستبەکار دەبن.

 

ئەوەی پێویستە بیزانیت: بە گوتەی د.سامان بەرزنجی، "هەرچەندە لە بودجەی گشتیی عێراق بۆ ساڵانی 2023 و 2024 و 2025، هەرێمی کوردستان مافی دامەزراندنی هەبووە، بەڵام تاوەکو ئێستا ئەو مافەمان پێنەدراوە، ئەمەش دامەزراندنی دەرچووانی پزیشکی دواخست".