نرخی مریشک لە بازاڕەکانی هەرێمی کوردستان دادەبەزێت

ئاڤا نیوز

لە ماوەی مانگی ڕابردوو بەهۆی زۆربوونی خواست و کەمبوونەوەی مریشک لە بازاڕەکان نرخەکەی بەرزبۆوە، بەڵام دوای گەورەبوونی بەرهەمی نوێ دووبارە نرخی مریشک لە بازاڕەکان دابەزی.

وێنە گەورەکە: لە هەرێمی کوردستان نرخی مریشک بەرزی و نزمی زۆر بەخۆیەوە دەبینێت، بەهۆی بارودۆخی دارایی و ڕێگرییەکان حکومەتی عێراق لە بەرهەمی ناوخۆ بۆ خوارو و ناوەڕاستی عێراق، هاوکات ڕێژەی بەرهەمی ناوخۆ زیاترە لە پێداویستییەکانی ناوخۆ ئەمەش هۆکارە بۆ بەرزی و نزمی بەرهەمەکانی ناوخۆ، لە مانگی ڕابردوو نرخی مریشک بەرزبوونەوەی بەخۆیەوە بینی، بەڵام لەئێستادا نرخەکەی دابەزیوە، ئەمەش زۆرجار زیان بە خاوەن پرۆژەکان دەگەیەنێت.

لێدوانی فەرمی: فیراس سدیق، بەڕێوەبەری سامانی ئاژەڵ لە وەزارەتی کشتووکاڵ، بە ئاڤا میدیای ڕاگەیاند، لە ماوەی ڕابردوودا نرخی مریشك بەرزبوونەوەی بەخۆیەوە بینی، یەک کیلۆ مریشک گەیشتە سێ هەزار و 400 دینار، بەڵام بەهۆی گەورەبوونی بەرهەمی نوێ‌، نرخەكەی ڕووی لە دابەزین کردۆتەوە.

زانیاریی زیاتر: ئێستا نرخی یەك كیلۆ مریشکی سپی دابەزیوە بۆ دوو هەزار و 500 دینار، ئێستا نرخی یەك كیلۆ مریشك لە نێوان دوو هەزار 250 دینار بۆ دوو هەزار 600 دینارە، هۆکارەکانیش جۆراوجۆرە یەکێک لە هۆکارەکان ڕێگرییەکانی بەرهەمی ناوخۆیە لە بەرهەمی هەرێمی کوردستان و پێگەیشتنی بەرهەمی نوێیە لەلایەن کێڵگە پەلەوەرییەکان و خستنە بازاڕیەتی بە ڕێژەیەکی زۆر.

ئەمەش بزانە: هەرێمی كوردستان ساڵانە پێویستی بە 105 هەزار تۆن مریشك هەیە، بەڵام بەرهەمی ناوخۆی 250 هەزار تۆنە، بۆیە پێویستە ئەو بەرهەمە ساغ بكرێتەوە، هەناردەی دەرەوەی هەرێمی کوردستان بکرێت.

ئەوەی پێویستە بیزانیت: لە هەرێمی كوردستان، هەزار و 840 کیڵگەی پەلەوەری هەن، دابەشبوون بەسەر پارێزگاکان، لە سنووری پارێزگای هەولێر 576 کێڵگەی پەلەوەر، سلێمانی 727 کێڵگەی پەلەوەر، دهۆك 344 پەلەوەرخانە و هەڵەبجەش 35 کێڵگەی پەلەوەری هەن.