لە بابل پڕۆژەیەکی وەهمی دەبێتە هۆی بەهەدەردانی 400 ملیار دینار

ئاڤا نیوز

پەرلەمانتارێک وردەکاریی پڕۆژەیەکی وەهمی لە پارێزگای بابل  ئاشکرا دەکات، کە بووەتە هۆی بەهەدەردانی 400 ملیار دینار. 

چیرۆکی سەرەکی: بەپێی چەند بەڵگەنامەیەک کە پەرلەمانتار ئەمیر مەعمووری، ئاشکرایکردووە، حکومەت گرێبەستی لەگەڵ کۆمپانیای عەرەبی عێراقی بۆ گەشەپێدانی سامانی ئاژەڵ کردووە، بۆ دروستکردنی ناوچەیەکی کشتوکاڵی و کارگەی بەرهەمهێنانی شیرەمەنی و سوود وەرگرتن لە سامانی ئاژەڵ و وێستگەی توێژینەوە و حەوزی بەخێوکردنی ماسی لەسەر ڕووبەری 12 هەزار و 318 دۆنم زەوی لە ناوچەی تەلیعەی شاری حیللە لە پارێزگای بابل .

لێدوانی فەرمی: مەعمووری لەگرتە ڤیدیۆیەکدا لەسەر ئەو زەوییە بیابانە دەڵێت: " لە بەرامبەر ئەم پڕۆژەیەی کە بەردی بناغەشی بۆ دانەنراوە، حکومەت کۆمپانیای ناوبراوی بۆ چەندین ساڵ لە باج و گومرگ بەخشیوە، بەمەش نزیکەی 400 ملیار دینار زەرەی لە دەوڵەتی عێراق داوە.

زانیاریی زیاتر: ئەو پەرلەمانتارە عێراقییە چەندین بەڵگەنامە دەخاتەڕوو کەتێیدا کۆمپانیای ناوبراو بەناوی پڕۆژەکەوە چەندین ماددە و کەرەستەی بیناکاری و ئاژەڵ و ماسی و دار و درەخت  هاوردەکردووە بەبێ ئەوەی باج و زەریبە بدات و لەبازاری ڕەش ساغی کردووەتەوە.  

ژمارەکان وادەڵێن: بەپێی ئەو بەڵگەنامانە کۆمپانیای عەرەبی عێراقی بۆ گەشەپێدانی سامانی ئاژەڵ ئەم ماددە و کەرەستانەی هاەردەکردووە:

600 هەزار تۆن ئاسنی پیشەسازی لە دەروازەکانی ئوم قەسر و شەلامچە هاوردەکردووە.
150 هەزار تۆن ئاسنی تایبەت بە کۆنکرێت.
پێنج هەزار تۆن دار.
300 هەزار تۆن سیرامیک و گرانێت.
90 هەزار ماتۆڕی ئاو.
200 وێستگەی کارەبا.
100 هەزار ماتۆڕ و خەزانی ئاو، جگە لە هەزاران تەبەقە هێلکە.