نەتەوەیەکگرتووەکان لەبارەی گەندەڵی لە عێراق هۆشداری دەدات

ئاڤا نیوز

نوێنەری سکرتێری گشتیی نەتەوەیەکگرتووەکان لە عێراق هۆشداری دایە عێراق لەبارەی بڵاوبوونەوەی گەندەڵی دارایی و کارگێڕی لە دامودەزگاکانی دەوڵەتدا، کە کاریگەری خراپی لەسەر بوارەکانی دیکەی ژیان هەیە.

 

چیرۆکی سەرەکی: شەممە 2025-8-30، محەممەد حەسسان، نوێنەری سکرتێری گشتیی نەتەوەیەکگرتووەکان لە عێراق لە کاتی بەشداریکردنی لە کۆنفرانسی بەرەنگاربوونەوەی گەندەڵی لە زانکۆی وارسی پێغەمبەر (د.خ)، سەر بە عەتەبەی حوسێنی، گوتارێکی پێشکەش کرد.

 

لێدوانی ڕۆژنامەوانی: حەسسان لە گوتارەکەیدا جەختی کردەوە کە گەندەڵی ڕێگرە لەبەردەم دادپەروەری و گەشەپێدان و بەرەنگاربوونەوەی بە ئەرکێکی ئایینی و ئەخلاقی وەسف کرد. ئاماژەی بەوەشدا کە نێردەی نەتەوەیەکگرتووەکان چەندین بەرنامەی بۆ ئەم مەبەستە پەرەپێداوە و کار لەسەر بەهێزکردنی دامەزراوە چاودێرییەکان دەکات بۆ دڵنیابوون لە پاکی و شەفافیەت.

 

لەهەمان کاتدا: حەسسان نیگەرانی خۆی دەربڕی لە بڵاوبوونەوەی گەندەڵی لە عێراق، کە تەنیا گەندەڵیی سیاسی ناگرێتەوە، بەڵکو گەندەڵیی ئەخلاقی، دارایی، کارگێڕی، دادوەری و زانستیش دەگرێتەوە. دووپاتیشی کردەوە کە "گەندەڵیی سیاسی زۆر مەترسیدارە".

 

لە کۆتاییدا، حەسسان داوای کرد بە تووندی و جێگیریی ڕووبەڕووی گەندەڵی ببنەوە و ستانداردەکانی پاکی و سەربەخۆیی دادگا و شەفافیەت بەهێز بکرێن. هاوکات داوای لێپرسینەوەی لە گەندەڵکاران کرد بەبێ جیاوازی، داوای دڵسۆزی و بەرپرسیارێتیی لەپێناو پاراستنی یەکپارچەیی وڵات کرد، دوور لە تائیفەگەری و گرووپگەری.