لە هۆلەندا گەورەترین فێستیڤاڵی قژسوورەکان دەکرێت

ئاڤا نیوز

قژسوورەکانی جیهان لە شاری تیلبۆرگی باشووری هۆڵەندا کۆدەبنەوە و بەشداری فێستیڤاڵێک دەکەن کە ساڵانە بۆیان ڕێکخراوە.

چیرۆکی سەرەکی: لە هۆڵەندا فێستیڤاڵی ڕۆژانی قژسوورەکان لە ڕۆژی 29-8-2025 دەستیپێکرد، چەندین بڕگەی وەک میوزیک و خواردن و وۆرکشۆپ بۆ پڕکردنەوەی پێداویستییە تایبەتەکانی قژسوورەکانی لەخۆگرتبوو، فێستیڤاڵەکە بەخۆڕاییە و کراوەیە بۆ هەمووان، تەنها وێنەگرتنی بەکۆمەڵ نەبێت کە ئەو ڕووداوە تەنها بۆ قژسوورە “سرووشتییەکان” سنووردارە.

ئەوەی پێویستە بیزانیت: ئەم نەریتە دوو دەیە لەمەوبەر سەریهەڵدا کاتێک بارت ڕۆوێنهۆرس، هونەرمەندی هۆڵەندی بانگەوازێکی بۆ 15 مۆدێلی قژ سوور بۆ پڕۆژەیەکی هونەری لە ڕۆژنامەیەکی ناوخۆییدا کرد، لەئەنجامدا  ژمارەیەکی زۆر لە قژ سوورەکان بەژدارییان کرد.

ئەوەی پێشبینی دەکرێت: ڕێکخەرانی فێستیڤاڵەکە پێشبینی دەکەن ئەم چالاکییە سێ ڕۆژە هەزاران کەس لەخۆبگرێت کە  لە نزیکەی 80 وڵاتەوە بەشداری بکەن.

زانیاریی زیاتر: ئەم ڤیستیڤاڵە لە ساڵی 2013 ژمارەی پێوانەیی جیهانی لە کتێبی گینس تۆمار کرد لەژێر ناوی "گەورەترین کۆبوونەوەی ئەو کەسانەی کە قژی سووری سرووشتییان هەیە".