لە سلێمانی هەڵمەتێک بۆ دەستگیرکردنی لایەنگرانی لاهوور شێخ جەنگی دەستی پێکردووە

ئاڤا نیوز

لە سلێمانی هەڵمەتێکی فراوانی دەستگیرکردنی لایەنگرانی لاهوور شێخ جەنگی و ئەوانەی لە ڕووداوەکەی لالەزار تێوەگلاون، دەستی پێکردووە و چەند ڕۆژێکە لە چەند ناوچەیەکی پارێزگای سلێمانی و ئیدارەی گەرمیان ژمارەیەک کەس دەستگیر کراون.

زانیاریی ئاڤا: ئاڤا زانیویەتی لەماوەی دوو ڕۆژی ڕابردوودا سێ ئەندامی بەرەی گەل لە گەرمیان دەستگیرکراون، بەڵام دوێنێ ئازاد کراون.

لێدوانی فەرمی:  شادمان مەلا حەسەن، سەرکردەی بەرەی گەل بە ئاڤای وت، لەم چەند ڕۆژە ترسێکی زۆریان لەناو لایەنگرانی بەرەی گەل لە پارێزگای سلێمانی و ئیدارەی گەرمیان بڵاوکردووەتەوە.

ڕوونی کردەوە، تا ئەو کاتەی کە قسە بۆ ئاڤا دەکەم، سێ ئەندامی بەرەی گەل لە کفری لە ترسی دەستگیرکردن هاتوونەتە هەولێر، ئەندامانی تریش ڕۆژانە لەو ناوچانە لە ترسی دەستگیرکردن دێن بۆ هەولێر.

لەلایەکی دیکەوە: سلێمان موحسین، وتەبێژی دەستەی سەربەخۆی مافی مرۆڤ لەبارەی دەستگیرکردنی ئەو ئەندامانە دەڵێت: ئێمە کار لەسەر ئەو سکاڵایانە دەکەین کە تۆمار دەکرێن، سکاڵایەکمان بۆ هاتبوو کەسێک لەسەر بابەتی سیاسی لە کەلار دەستگیرکرابوو، بەدواداچوونمان بۆ کرد و ئێستا ئازاد کراوە.

وتیشی، سبەی و دوو سبەی سەردانی ئەو کەسانە دەکرێت کە لە ڕووداوەکەی لالەزار لەلایەن ئاسایشەوە دەستگیرکرابوون، لەم دوو ڕۆژە کەسوکاریان دەتوانن سەردانیان بکەن و لە سەلامەتییان دڵنیاببنەوە.