سوودانی و ڕێبەر ئەحمەد و شاندێکی ئیماڕات دەچنە مووسڵ

ئاڤا نیوز

 

سبەی دووشەممە وەزیری ناوخۆی هەرێمی کوردستان و سەرۆکوەزیرانی عێراق سەردانی شاری مووسڵ دەکەن و بەشداریی لە مەڕاسیمی کردنەوەی مزگەوتی (نووری) دەکەن.

 

وێنە گەورەکە: مزگەوتی نووری یەکێکە لە ناسراوترین شوێنەوارەکانی مووسڵ، ساڵی 2014 ناوبانگێکی جیهانی وەرگرت کاتێک ئەبوبەکر بەغدادی، خەلیفەی داعش دامەزراندنی خەلافەتەکەی لەو مزگەوتەوە ڕاگەیاند، بەڵام لە ئۆپەراسیۆنی کۆنتڕۆڵکردنەوەی مووسڵ لە ساڵی 2017دا خاپوور بوو، ماوەی چەند ساڵێکیش بوو لەچوارچێوەی ئەو 115 ملیۆن دۆلارەی بۆ نۆژەن کردنەوەی شوێنە کەلەپوورییەکانی مووسڵ کۆکراببووەوە، مزگەوتەکە بە سەرپەرشتیی یونسکۆ کاری نۆژەن کردنەوەی بۆ دەکرا.

 

لێدوانی فەرمی: شێروان دووبەردانی، ئەندامی پەرلەمانی عێراق بە ئاڤا میدیای ڕاگەیاند، سبەی دووشەممە محەممەد شیاع سوودانی، سەرۆکوەزیرانی فیدڕاڵ و ڕێبەر ئەحمەد، وەزیری ناوخۆی حکومەتی هەرێمی کوردستان سەردانی مووسڵ دەکەن، ئامانجی سەردانەکەش بۆ بەشداری کردنە لە مەراسیمی کردنەوەی مزگەوتی نووری دوای نۆژەنکردنەوەی.

 

وتیشی، شاندێکی ئیماراتیش کە پاڵپشتی دارایی نۆژەن کردنەوەی مزگەوتی نووری کردووە، لە هەولێرەوە یاوەری وەزیری ناوخۆی حکومەتی هەرێمی کوردستان دەکەن و لەگەڵ ژمارەیەک کەسایەتی و سەرۆک هۆزەکان لە مەڕاسیمەکەدا بەشدار دەبن.

 

ئەوەی پێویستە بیزانیت: بەوتەی دووبەردانی لە پەراوێزی کردنەوەی مزگەوتی نوور، هیچ کۆبوونەوەیەک لەنێوان شاندی هەولێر و بەغدا ناکرێت بەمەبەستی تاوتوێ کردنی دۆسییەکان بەگشتی و پرسی شنگال و دەشتی نەینەوا بەتایبەتی، چونکە ئامانجی سەردانەکە تەنیا بۆ بەشداربوونە لەو مەراسیمە.

 

لەلایەکی دیکەوە: د. فازیل بەدرانی، بریکاری وەزارەتی ڕۆشنبیریی و شوێنەواری عێراقیش بە ئاڤا میدیای ڕاگەیاند، جگە لە شاندی کوردستان و حکومەتی فیدڕاڵ، شاندێکی ئیماراتیش کە پێکهاتوون لە نوورە کەعبی، وەزیری دەوڵەتی ئیمارات بۆ کاروباری دەرەوە و شێخ سالم خالید قاسمی، وەزیری ڕۆشنبیری ئەو وڵاتە، سبەینێ لەڕێگەی فڕۆکەخانەی نێودەوڵەتیی هەولێرەوە دێنە عێراق و لە مەڕاسیمی کردنەوەی مزگەوتی نووری، کەنیسەکانی ساعە و تاهیرە لە مووسڵ بەشداری دەکەن.