بەرەی گەل: میلیشیا لەیاسا دەرچووەكان بەردەوامن لە ڕەشبگیریی لایەنگرانمان

ئاڤا نیوز

بەرەی گەل ڕایدەگەیەنێت، جگە لە كوشتن و دەستگیركردن و بێسەروشوێنكردنی ژمارەیەك لە پاسەوانان و هەڤاڵانی لاهوڕ شێخ جەنگی، سەرۆكی قەوارەكەیان، چەكدارانی یەكێتی چەند ڕۆژێكە هەڵمەتێكی ڕەشبگیری و هەڵكووتانە سەرماڵی لایەنگرانی بەرەی گەلیان دەستپێكردووە و هاناش بۆ سەرۆكی هەرێمی كوردستان دەهێنن.

وێنە گەورەكە: شەوی 22ـی ئەم مانگە لە شاری سلێمانی، یەكێتی نیشتمانیی كوردستان بە هێزێكی زۆری كۆماندۆ و تانك و تۆپ و چەكی قوورسەوە، هێرشی كردە سەر هۆتێل لالەزار؛ شوێنی مانەوەی لاهوڕ شێخ جەنگی و بەشێك لە سەركردەكانی بەرەی گەل، دوای شەڕێكی چەند كاتژمێری و قوربانیی زۆری مرۆیی و ماددی، سەرۆكی بەرەی گەل و دوو برای دەستگیركران.

ڕاگەیێنراوی فەرمی: قەوارەی سیاسیی 'بەرەی گەل' لە ڕاگەیێنراوەكەدا ئاماژەیان بەوەكردووە، ڕۆژی 22ـی ئاب، بەبێ بوونی هیچ پاساوێكی سیاسی و یاسایی و ئەمنی، میلیشیا لەیاسادەرچووەكانی یەكێتیی نوێ، دوور لە هەموو بەها و ڕێكارێكی یاسایی، هەڵیانكووتایە سەر ماڵی سەرۆكی قەوارەی بەرەی گەل و ئەندامی هەڵبژێردراوی پەرلەمانی كوردستان و ئەندامی باڵای ئەنجوومەنی ئاسایشی كوردستان هەڤاڵ لاهور شێخ جەنگی، بە دڕندانەترین شێوە بە ئاگر و ئاسن مامەڵەیان لەگەڵ چەند پاسەوانێكی تایبەتی ناوبراو و هەڤاڵەكانی كرد؛ دوای شەهیدكردنی ژمارەیەك لە پاسەوانانی ماڵەكەی خۆی و دەستگیركردنی ژمارەیەك لە هەڤاڵەكانی كە زۆربەیان تاكو ئێستا چارەنووسیان نادیارە، ماوەی 10 ڕۆژیشە میلیشیا لەیاسا دەرچووەكان بەردەوامن لە ڕەشبگیری و هەڵكووتانە سەر ماڵی لایەنگرانی بەرەی گەل.

زانیاریی زیاتر: بەرەی گەل وەك قەوارەیەكی سیاسی، داوا لە هەردوو حكومەتی فیدڕاڵ و حكومەتی هەرێمی كوردستان دەكات، بەتایبەت سەرۆكی هەرێمی كوردستان كە فەرماندەی گشتیی هێزە چەكدارەكانە، بەزووترین كات دەستوەردان بكات و ئەو كردە نایاسایی و نامرۆڤانەی چەكدارانی یەكێتی ڕابگرێت.

بەرەی گەل داوا دەكات یاسا بەبێ هەژموونی حیزبی و كەسی، كاری خۆی بكات نەك هێزی میلیشیایی و ویست و ڕقی كەسی.