ئەمریكا و هاوپەیمانان دڵنیایی بە پێشمەرگە دەدەن

ئاڤا نیوز

لەمیانەی كۆبوونەوەیەكی لەگەڵ وەزیری پێشمەرگەی حكومەتی هەرێمی كوردستان، بەرپرسێكی باڵای كونسوڵخانەی گشتیی ئەمریكا لە هەولێر، دڵنیایی دەدات كە ئەمریكا و هاوپەیمانان لە هاوكاریكردنی هێزەكانی پێشمەرگە بەردەوام دەبن.

وێنە گەورەكە: ئەمڕۆ دووشەممە 1-9-2025، شۆڕش ئیسماعیل، وەزیری پێشمەرگەی حکومەتی هەرێمی کوردستان پێشوازی لە کۆڵۆنێڵ دێک پایلویک، بەرپرسی نووسینگەی هاریکاری ئاسایش لە کونسوڵخانەی گشتیی ئەمریکا لە هەرێمی کوردستان و تیمێکی سەربازیی یاوەری کرد.

ڕاگەیێنراوی فەرمی: وەزارەتی پێشمەرگە بڵاوی كردەوە، لە كۆبوونەوەكەدا سەبارەت بە دوایین بەرەوپێشچوونەکانی پرۆسەی چاکسازی و بنیاتنانی دوو ناوچەی سەرکردایەتیی سەربازی و فیرقەکانی پیادە لە وەزارەتی پێشمەرگە گفتوگۆ کرا، وەزیری پێشمەرگە ڕایگەیاند: پرۆسەی چاکسازی بەردەوامە و هەوڵەکانمان بۆ سەرخستنی چاکسازی چڕتر کردووەتەوە.

وەزیری پێشمەرگە ڕاشیگەیاند، "هێزی پێشمەرگەی کوردستان لە قۆناغی گەشەسەندن و بەهێزبووندایە بۆ ئەمەش پێویستمان بە هاوکاری دۆستەکانمانە لە سەروو هەموویانەوە ئەمریکا، دڵنیابووینەوە ئەمریکا و هاوپەیمانان لە هاوکاری و پشتیوانی هێزی پێشمەرگەی کوردستان بەردەوام دەبن".

بۆچوونی لایەنی بەرامبەر: کۆڵۆنێڵ دێک پایلویک، بە سەردانیکردنی وەزارەتی پێشمەرگە و لە نزیکەوە ئاگاداربوون لە بەرەوپێشچوونەکانی پرۆسەی چاکسازی دڵخۆشی خۆیی دەربڕی و ڕایگەیاند: بەردەوام هاوکاری وەزارەتی پێشمەرگە دەبین بۆ بنیتانانی ژێرخانێکی سەربازیی نیشتمانی بەهێز و بە ئامانجگەیاندنی پرۆسەی چاکسازی.