لە نۆ مانگدا زیاتر لە 110 هەزار ئۆتۆمبێل هاوردەی هەرێمی کوردستان کراوە

ئاڤا نیوز

لە نۆ مانگی ڕابردوودا زیاتر لە 110 هەزار ئۆتۆمبێلی جیاواز لەلایەن کۆمپانیا و بازرگانانەوە هاوردەی هەرێمی کوردستان کراون.

وێنە گەورەکە: بەهۆی کەمی جۆری هۆکارەکانی گواستنەوەی وەک میترۆ و شەمەندەفەر، هاونیشتمانیانی هەرێمی کوردستان و عێراق بەشێوەیەکی سەرەکی بۆ هاتووچۆکردن پشت بە ئۆتۆمبێل دەبەستن، بەمەش خواست لەسەر کڕینی ئۆتۆمبێل زۆر بووە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانیی هەرێمی کوردستان بە ئاڤای وت: لەو نۆ مانگەدا 526 مۆڵەتمان بە کۆمپانیا و بازرگانان داوە، 110 هەزار ئۆتۆمبێل لەڕێگەی دەروازە سنوورییەکانەوە هاوردەی هەرێمی کوردستان کراون.

زانیاریی زیاتر: ئۆتۆمبێلەکان لە خەسڵەتی بەنزین، هایبرێد و کارەبایی پێکهاتوون، لە وڵاتەکانی ئەمریکا، ئەڵمانیا، یابان، چین و چەند وڵاتێکی دیکەوە هاوردە کراون، بەشێکیان بۆ شارەکانی دیکەی عێراق نێردراون.

باکگراوند: ساڵی ڕابردوو 924 مۆڵەتی هاوردەکردنی ئۆتۆمبێل دراوە، لە دەروازەکانی ئیبراهیم خەلیل، پەروێزخان و باشماخ 172 هەزار و 234 ئۆتۆمبێل هاوردە کرا بوو.