شاسوار عەبدولواحید سزای بەندکردنی بۆ دەرچوو

ئاڤا نیوز

دوای سێ جار دانیشتنی دادگا، سەرەنجام ئەمڕۆ سێشەممە دادگای سلێمانی سزای پێنج مانگ زیندانیکردنی بەسەر شاسوار عەبدولواحید، سەرۆکی جوڵانەوەی نەوەی نوێ سەپاند. 

چیرۆکی سەرەکی: کێشەی نێوان شادی نەوزاد و شاسوار عەبدولواحید دەگەڕێتەوە بۆ ساڵی 2019، کاتێک شادی نەوزاد کە ئەوکات ئەندامی فراکسیۆنی نەوەی نوێ بوو، لە جووڵانەوەکە  جیابووەوە. دواتر لە کۆنگرەیەکی ڕۆژنامەوانیدا مۆبایلەکەی بەرزکردەوە و نامەی هەڕەشەئامێزی نیشانی میدیاکان دا و ڕایگەیاند کە "شاسوار و باندەکەی هەڕەشەی بڵاوکردنەوەی ڤیدیۆی ڕووتمان لێدەکەن  هەر لەو کاتەدا بەڵێنی تۆمارکردنی داوای یاسایی دا.

زانیاری پەیامنێر: ژیوار عەبدولرەحمان، پەیامنێری ئاڤا لەبەردەم دادگای سلێمانی ڕایگەیاند، دادگا سزای پێنج مانگ زیندانیکردنی بۆ شاسوار عەبدولواحید دەرکرد، ئەو سزایە هەمان ئەو سزایە بوو کە پێشتر دادگا بەشێوەی غیابی بۆ سەرۆکی جوڵانەوەی نەوەی نوێی دەرکرد بوو. ئەمڕۆ بە ماددەی 431 لە یاسای سزادانی عێراقی ئەو سزایەی بۆ دەرچوو. 

ئەوەی پێویستە بیزانیت: شەوی 12 ئابی ئەمساڵ شاسوار عەبدولواحید، سەرۆکی جوڵانەوەی نەوەی نوێ لە گوندی ئەڵمانی لەناو ماڵەکەی خۆی لەلایەن پۆلیسەوە دەستگیر کرا.