زیاتر لە 100 هەزار تۆن پەتاتە لە دهۆکەوە هەناردەی شارەکانی عێراق دەکرێت

ئاڤا نیوز

لە هەشت مانگی یەکەمی ئەمساڵ 116 هەزار تۆن پەتاتە لە دهۆکەوە هەناردەی شارەکانی باشوور و ناوەڕاستی عێراق کراوە و پرۆسەکەش بەردەوامە.

وێنە گەورەکە: بەرووبوومی ساڵانە پەتاتە لە هەرێمی کوردستان دەگاتە نزیکەی 650 هەزار تۆن، بڕێکی زۆری ئەو بەرووبوومە لە سنووری پارێزگای دهۆکە، بەرهەمی پەتاتە لە پێداویستی ناوخۆ زیاترە بۆیە بەشێکی زۆری هەناردەی باشوور و ناوەڕاستی عێراق و دەرەوەی وڵاتیش دەکرێت.

زانیاریی بەدەستهاتوو: لە مانگی هەشتی ئەمساڵ 28 هەزار و 661 تۆن پەتاتە هەناردەی باشوور و ناوەراست کراوە، زۆرترینی لە سنووری قەزای بەردەڕەش بووە و 17 هەزار و 189 تۆن پەتاتە لەو قەزایەوە هەناردە کراوە.

لێدوانی فەرمی: ئەحمەد جەمیل، بەڕێوەبەری گشتیی کشتوکاڵی دهۆک بە ئاڤامیدیای گوت: بەرووبوومی پەتاتە لە سنووری پارێزگای دهۆک ئەمساڵ نزیکەی 600 هەزار تۆنە، لەو بڕە 116 هەزار تۆنی هەناردەی باشوور و ناوەڕاست کراوە و پرۆسەکەش بەردەوامە.

زانیاریی زیاتر: لە سەرەتای ئەمساڵەوە 163 هەزار و 447 تۆنە بەرووبوومی کشتوکاڵی دهۆک هەناردە باشوور و ناوەڕاست کراون، 48 هەزار و 550 تۆنی لە مانگی هەشتەوە بووە.

ئەمەش بزانە: ئەو بورووبوومانەی هەناردە کراون بریتین لە؛ پەتاتە، پیاز، خەیار، هەنجیر، کولەکە، تەماتە و گندۆرە.

بۆچی گرنگە: بڕی بەرووبوومی پەتاتە و هەناردەکردنی بۆ دەرەوە کاریگەریی دەبێت لەسەر دابینکردنی ئاسایشی خۆراک و فرەچەشنکردنی سەرچاوەکانی داهات، لەهەمان کاتیش کاریگەریی ڕاستەوخۆی دەبێت لەسەر باشترکردنی بار و گوزەرانی جووتیاران.

ئەوەی پێویستە بیزانیت: هەر جووتیارێک بەرووبوومی پەتاتە هەناردە بکات لەلایەن بەڕیوەبەرایەتیی گشتیی کشتوکاڵی پارێزگاکان نووسراوییان بۆ دەکرێت و ئاسانکارییان بۆ دەکرێت.

بەتەنیشت ئەم بابەتەوە: هاوردەکردنی پەتاتەی خواردن بۆ هەرێمی کورستان بەهەموو شێوەیەک قەدەغەیە و پەتاتەی پیشەسازیش لەکاتی پێویستی و بەپێی نووسراوی فەرمی هاوردە دەکرێت.