بابەکر زێباری: تا کۆتایی ساڵی 2026 کارەکانی یەکخستنەوەی هێزەکانی پێشمەرگە کۆتایی دێت

ئاڤا نیوز

 

بابەکر زێباری، ڕاوێژکاری سەرۆکی هەرێمی کوردستان بۆ کاروباری سەربازی دەڵێت، کارەکانی یەکخستنەوەی هێزەکانی پێشمەرگە تا کۆتایی ساڵی 2026 کۆتایی دێت. جەختیش دەکاتەوە هاوکارییەکانی هاوپەیمانان بۆ پێشمەرگە بەردەوامن و هیچ کەموڕییەکیان نییە.

 

 

وێنە گەورەکە:  کابینەی نۆی حکومەتی هەرێمی کوردستان کاری زۆری کرد بۆ یەکگرتنەوەی هێزەکانی پیشمەرگە، بەپێی ئەو لێکتێگەیشتنەش کە وەزارەتی پێشمەرگە و هێزەکانی هاوپەیمانان کردوویانە، تاوەکوو ساڵی 2026 دەبێت هەموو هێزەکانی پیشمەرگە یەکخرابن، هەنگاوەکانی ئەو یەکخستنە دەستی پێکردووە و کاری بەردەوامییان لەسەر دەکرێت.

 

لێدوانی فەرمی: بابەکر زێباری، ڕاوێژکاری سەرۆکی هەرێمی کوردستان بۆ کاروباری سەربازی بە ئاڤا میدیای گوت: یەکخستنەوەی هێزەکانی پێشمەرگە زۆر بە باشی و بەخێرایی بەڕێوەدەچێت و تا کۆتایی ساڵی 2026 یەکخستنەوەیان تەواو دەبێت.

-  هاوکارییەکانی هاوپەیمانان بۆ پێشمەرگە بەردەوامن و هیچ کەموڕییان نییە.

-  هێزەکانی ئەمریکا لە عێراق ژمارەیان کەمە، بەڵام ئەوە مانای ئەوە نییە کە کاریگەرییان کەم بێت.

-   نەهاتنە پێشەوەی ئێران بۆ گفتوگۆ لەسەر پرۆگرامە ئەتۆمییەکەی مەترسی هەڵگیرسانەوەی شەڕی لێ دەکرێت.

- یەکێک لە هۆکارەکانی کشانەوەی هێزەکانی ئەمریکا لە عێراق دوورکەوتنەوەیە لە مەترسی بە ئامانج گرتنیان لە گرووپەکانی بەرەی مقاوەمە.

 

بابەکر زێباری ئەمانەشی گوت:

 

-   هەندێ گرووپ لە عێراق هەن گوێڕایەڵی فەرمانەکانی فەرماندەیی هێزەکانی عێراق نابن.

-    ئەگەر گرووپە چەکدارەکان هێزەکانی ئەمریکا و بەرژەوەندییەکانی ئەمریکا بە ئامانج بگرن عێراق ڕووبەڕووی سزای توند دەبێتەوە.

-  ئەگەر گرووپەکانی حەشدی شەعبی لەگەڵ ئەمریکا و ئیسرائیل نەکەونە کێشە و ئاڵۆزی ئەوا هێرشیان ناکرێتە سەر، بەڵام ئەگەر خۆیان تووشی ئەو شەڕە بکەن هاوشێوەی حووسی و حزبوڵڵا و حەماسیان بەسەر دێت.