بەدواداچوونی ئاڤا؛ له‌ كۆیه‌ به‌شێكی زۆری به‌رهه‌مە كشتوكاڵییەکان به‌ ئاوی قورس ئاو ده‌درێن

ئاڤا نیوز

 

بەگوێرەی بەدواداچوونەکانی ئاڤا بەشێکی بەرچاو لە بەرووبوومە کشتوکاڵییەکان و ماسییەکانی کۆیە بە ئاوی زێراب و پاشماوەی پیس ئاو دەدرێن و بەخێو دەکرێن. ئەمەش نیگەرانییەکی زۆری لای هاووڵاتییان و بەرپرسانی تەندروستی ناوچەکەی دروست کردووە.

بەدواداچوونی ئاڤا: هیشام سەعید، پەیامنێری ئاڤا چووەتە دەشتی کۆیە و بەدواداچوونی وردی بۆ ئەم پرسە کردووە و لەگەڵ هاوڵاتییەکدا قسەی کردووە کە ئاشکرای کردووە، بەشێکی زۆری سەوزەی ئەو ناوچەیە بە ئاوی زێراب ئاو دەدرێت. ئەو هاووڵاتییە دەشڵێت، بەهۆی ئەم کارەوە، خۆی ناچارە سەوزەی پێویست لە دەرەوەی کۆیە، وەک تەقتەق، بکڕێت.

 

بەپێی زانیارییەکانی ئاڤا، سەوزەکانی وەک (توور، سڵق، لۆبیا، بامیە، باینجان، ترۆزی، بیبەر و گەنمەشامی) و تەنانەت هەنجیریش بە ئاوی پیس ئاو دەدرێن، ئەمەش وای کردووە بۆنەکەی ئەوەندە ناخۆش و پیس بێت، ئەوەی بەو شوێنەدا بچێت، دەبێت دەموچاوی دابپۆشێت بۆ ئەوەی لە کاریگەریی بۆنەکە پارێزراو بێت.

لەلایەکی دیکە: سەوزەفرۆشێک لە کۆیە بە ئاڤای ڕاگەیاند: "نزیکەی 90%ی بەرهەمەکانی کۆیە بە ئاوی پیس ئاو دەدرێن، پاشان بە فێڵ و بە سوێندخواردن بەسەر خەڵکدا ساغ دەکرێنەوە. من بە ناچاریی سەوزە و میوە لە سلێمانی یان هەولێرەوە دەهێنم، چونکە ویژدانم قبووڵ ناکات ئەو بەرهەمە خراپانە بدەمە خەڵکی شارەکەم."

بە تەنیشت ئەم بابەتەوە: جگە لە مەترسییەکانی سەر بەرووبوومە کشتوکاڵییەکان، هەندێک لە حەوزەکانی ماسی لە کۆیەش بە هەمان شێوە ئاوی زێراب بەکاردەهێنن بۆ بەخێوکردنی ماسی، ئەمەش مەترسییەکی دیکەی تەندروستی بۆ بەکاربەرانی ماسی دروست دەکات.

لێدوانی فەرمی: دکتۆرە تارا جەمال، بەڕێوەبەری پاراستنی تەندروستی لە قەزای کۆیە بە ئاڤای ڕاگەیاند: "ئەو سەوزە و میوانەی بە ئاوی قورس (پیس) ئاو دەدرێن، لە ڕووی تەندروستییەوە دەبنە هۆی بڵاوبوونەوەی چەندین ڤایرۆس و نەخۆشی جۆراوجۆر. بۆیە بە هاوکاریی هێزە ئەمنییەکان و لیژنەکانی قائیمقامیەت، توانیمان لە ڕێگەی بڵاوکردنەوەی هۆشیاری و سزادانی سەرپێچیکاران، هەوڵی کۆنتڕۆڵکردنی دۆخەکە بدەین."

دکتۆرە تارا جەمال دەشڵێت، لە ساڵی 2024دا لە سنووری کۆیە، شەش پارچە زەوی کشتوکاڵی بەهۆی بەکارهێنانی پاشماوەی ئاوی تەوالێت، حەمام و زێرابەکان تێکدراون. هەروەها بۆ ساڵی 2025، لە ڕێگەی پێدانی مۆڵەتی یاسایی بە خاوەن زەوییە کشتوکاڵییەکان کە ژمارەیان نزیکەی 20 پارچە زەوی دەبێت، هەوڵ دەدرێت بۆ نەهێشتن و تێکدانی ئەو زەوییانەی کە بە شێوەیەکی نایاسایی بەرووبوومە کشتوکاڵییەکانیان ئاو دەدەن.