لیژنەیەکی هەمیشەیی لەنێوان کوردستان و عێراق پێکدەهێنرێت

ئاڤا نیوز

 

دوای کۆبوونەوەکەی 4ی ئابی نێوان بەغدا و نوێنەرانی کوردستان، سەرۆکی ئەنجوومەنی وەزاریی عێراق بۆ کاروباری ئابووری بڕیاری پێکهێنانی لیژنەیەکی هەمیشەیی بۆ یەکخستنی پێناس و باجی گومرگی لەنێوان عێراق و کوردستان دەرکرد، ئەندامانی لیژنەکەش دیاری کران.

وێنە گەورەکە: 4ی ئاب ئەنجوومەنی وەزاریی عێراق بۆ کاروباری ئابووری بە ئامادەبوونی نوێنەرانی هەرێمی کوردستان کۆبووەوە، بۆ چارەسەری کێشەکان و جێبەجێکردنی بڕیاری حکومەتی فیدراڵ بۆ یەکخستنی پێناس و باجی گومرگی، لە کۆبوونەوەکەدا بڕیاردرا عێراق و کوردستان لیژنەیەکی هەمیشەیی تایبەت بە دەروازەکان و گومرگ پێکبهێنن.

 

نوسراوی فەرمی: فوئاد حوسێن، سەرۆکی ئەنجوومەنی وەزاریی عێراق بۆ کاروباری ئابووری ڕۆژی 7ی ئاب، واژۆی لەسەر نووسراوێک کردووە کە کۆپییەکی دەست ئاڤا کەوتووە بۆ پێکهێنانی لیژنەیەکی هەمیشەیی بۆ یەکخستنی پێناس و باجی گومرگی لەنێوان حکومەتی فیدڕاڵ و حکومەتی هەرێمی کوردستان.

 

ئەوەی پێویستە بیزانیت: لیژنەکە نوێنەری پێنج لایەنی پەیوەندیداری حکومەتی فیدڕاڵ و حکومەتی کوردستان لەخۆ دەگرێت و کراوە بە مەرج کە نوێنەری ئەو لایەنانە دەبێت پلەکانیان لە بەڕێوەبەری گشتی کەمتر نەبێت، لیژنەکە ڕاوێژکاری سەرۆکوەزیرانی عێراق بۆ کاروباری دەروازەکان، گومرگ و گواستنەوە سەرۆکایەتی دەکات.

 

هەریەکە لە بەڕێوەبەری گشتیی دەستەی گومرگ لە وەزارەتی دارایی فیدڕاڵ، نوێنەری وەزارەتەکانی بازرگانی، بانکی ناوەندی، دەستەی دەروازە سنوورییەکانی عێراق و دوو نوێنەری حکومەتی هەرێمی کوردستانیش تیایدا ئەندام دەبن.

 

لیژنەکە دوو ئەرکی دەبێت ئەوانیش بریتین لە: 

یەکەم: تاوتوێ کردن و پێشنیازکردن بەمەبەستی یەکخستنی جێبەجێکردنی یاسا و ڕێنماییەکان لە سەرجەم دەروازە سنوورییەکان.

 

دووەم: تاوتوێ کردنی ئەو پرسانەی پەیوەستن بە بەبڕیاری ژمارە 270ی حکومەتی عێراق کە ساڵی 2025 دەریکردووە، لەگەڵ دروستکردنی هەماهەنگی بەمەبەستی جێبەجێکردنی بەیاننامەی گومرگی و پێشکەشکردنی ڕاسپاردە بۆ جێبەجێکردنی بڕیاری یەکخستنی پێناس و باجی گومرگی، ڕاسپاردەکانیش پێویستە 30 ڕۆژ دوای پێکهێنانی ئەم لیژنە پێشکەش بکرێن.

 

بەگوێرەی خاڵی دووەمی نووسراوەکەی سەرۆکی ئەنجوومەنی وەزاری عێراق بۆ کارووباری ئابووری، لیژنەکە دەتوانێت بەگوێرەی پێویست لیژنەی لاوەکیش پێکبهێنێت و هەر کەس و لایەنێکیش میوانداریی بکات کە بە گونجاوی دەزانێت.