سەرجەم ئەو موڵکانەی بە ناوی کۆمپانیای چاڤی تۆمار کراون بە زیاد کردنی ئاشکرا دەفرۆشرێن

ئاڤا نیوز

وەزارەتى دارایى و ئابوورى ڕایگەیاند، سەرجەم ئەو موڵکانەی بەناوى کۆمپانیاى چاڤى تۆمارکراون لەڕێگەی زیادکردنی ئاشکراوە لە بەرامبەر قەرزی خاوەن قەرز دەفرۆشرێن کە بڕەکەی زیاتر لە 91 ملیار دینارە.

وێنە گەورەکە:  شاسوار عەبدولواحید، سەرۆکی جووڵانەوەی نەوەی نوێ خاوەندارێتیی هەردوو کۆمپانیای نالیا و چاڤی دەکات، لە سەرەتای دامەزراندنی کۆمپانیاکانی قەرزێکی زۆری بەناوی وەبەرهێنان لە حکومەتی هەرێمی کوردستان وەرگرتبوو، ئێستا بڕی قەرزەکان گەیشتووەتە نزیکەی 92 ملیار دینار، لە بەرامبەردا وەزارەتی دارایی و ئابووریی هەرێمی کوردستان ڕایگەیاند، لەسەر داوای بانکە بازرگانییەکان بڕیار درا دەست بەسەر سەرجەم موڵکەکانی کۆمپانیای چاڤی لاند و نالیا بگیرێت.

زانیاریی بەدەستهاتوو: وەزارەتى دارایى و ئابوورى ڕایگەیاند، بەڕێوەبەرایەتیی جێبەجێکردنی دووەمی سلێمانی، لەڕێگەی زیادکردنی ئاشکراوە هەڵدەستێت بە فرۆشتنی سەرجەم ئەو موڵکانەی بەناوى کۆمپانیاى چاڤى تۆمارکراون، ئەویش بەرامبەر قەرزی خاوەن قەرز (بانکی سلێمانی/یەک) کە بڕەکەی 91 ملیار و 760 ملیۆن و 660 هەزار و 350 دینارە.

شێوازی جێبەجێکردن: بەڕێوەبەرایەتیی جێبەجێکردنی دووەمی سلێمانی، زانیارى لەبارەى موڵکەکان و نرخەکانى دیار کردووە و داوا دەکات، هەر کەسێک ئارەزووی بەشداریکردنی هەیە با سەردانی بەڕێوەبەرایەتییەکەیان بکات و لە بەشی ژمێریاری بارمتەی یاسایی بە رێژەی 10%ـی نرخی خەمڵێندراوی موڵکەکانی ئاماژەبۆکراو دابنێت و ناسنامەی نیشتمانی و کارتی زانیاری لەگەڵ خۆیدا ببات.

هەنگاوی داهاتوو: زیادکردنی ئاشکرا بۆ فرۆشتنی موڵکەکان دوای 30 ڕۆژ لە بڵاوکردنەوەی زیادکردنەکە لە ڕۆژنامە دەکرێت.

زانیاریی زیاتر: موڵکەکان پێکهاتوون لە چەندین پارچە زەوی، هۆتێل، کافتریا و کابینەی گەشتیاری و چەندین موڵکی تر.

باکگراوند: قەرزەکانی کۆمپانیای چاڤی و نالیا لە ساڵانی 2010 و 2011 وەرگیراون و بڕیار بوو لە ماوەی دوو ساڵدا بگەڕێنرێنەوە، بەڵام نەگەڕێنراونەتەوە، دۆسیەکەش لە ساڵی 2015ـەوە لە دادگا بووە و لە 20-10-2021 دادگا لە بەرژەوەندی وەزارەتی دارایی دۆسیەی قەرزەکانی یەکلایی کردەوە و لە 22-9-2024 گلدانەوە لەسەر سەرجەم موڵکەکانی کۆمپانیای نالیا و کۆمپانیای چاڤی دانرا، لە 26-11-2024 دادگا تانەی پێداچوونەوەی نالیای ڕەتکردەوە.

ئەمەش بزانە: بۆ بینینی وردەکاری سەرجەم موڵکەکان و نرخی خەمڵێندراوی کلیک لەسەر ئەم لینکەی خوارەوە بکە: