دەستەی ناوچە كوردستانییەكان: هێشتا كێشەی وەڵامدانەوەی قوتابیان بە زمانی كوردی چارەسەر نەكراوە

ئاڤا نیوز

دەستەی گشتیی ناوچە كوردستانییەكانی دەرەوەی ئیدارەی هەرێم ڕایدەگەیەنێت، هێشتا كێشەی وەڵامدانەوەی خوێندكاران و قوتابیان بە زمانی كوردی لە تاقیكردنەوەكان، چارەسەر نەكراوە. دووپاتیشی دەكاتەوە پێویستە نووسراوەكەی وەزارەتی خوێندنی باڵای عێراق بە نووسراو هەڵبوەشێتەوە نەك بە گفتوگۆی زارەكی.

چیرۆکی سەرەکی: وەزارەتی خوێندنی باڵای عێراق ڕێگری دەكات لە وەڵامدانەوەی خوێندكاران و قوتابیانی زانكۆ بە زمانی كوردی لە تاقیكردنەوەكان، بە بیانووی ئەوەی خوێندن لە زانكۆكاكانی پارێزگاكانی كەركووك، دیالە و نەینەوا، بە زمانەكانی عەرەبی و ئینگلیزییە، ئەو بڕیارەش كاردانەوەی تووندی بەدوای خۆیدا هێناوە و دوای چەند كاتژمێرێك لە دەرچوونی، نووسراوەكە بە زارەكی هەڵوەشێنرایەوە.

ڕاگەیێنراوی فەرمی: دەستەی گشتیی ناوچە كوردستانییەكان لە ڕاگەیێنراوێكدا ئاماژەی بەوە كردووە، دوای نووسراوی ڕێگرییەكە، ئەوكات و دوای هەوڵەكان وەها بڵاوكرایەوە كە كێشەكە چارەسەركراوە و قوتابیان دەتوانن بە زمانی كوردی وەڵام بدەنەوە، بەڵام بەداخەوە ئەو كێشە كە سەرەڕای ئەوەی پێشێلكارییەكی ئاشكرای ماددە (4)ـی دەستووری هەمیشەیی عێراقە، هێشتا چارەسەر نەكراوە و ڕێگرییەكان وەك خۆیان ماون، بەتایبەت بۆ خوێندكارانی بەشی یاسا و ئەو وانانەی كە تاقیكردنەوەی وزارین.

زانیاریی زیاتر: دەستەی ناوچە كوردستانییەكان لە هەوڵی بەردەوامدایە بۆ چارەسەركردنی كێشە و لادانی بەربەستەكانی بەردەم زمانی كوردی كە لەپاڵ زمانی عەرەبی، زمانی فەرمیی عێراقە. داواش لە بەرپرسانی كورد لە بەغدا دەكات، هەوڵەكانیان چڕبكەنەوە بۆ ئەوەی دەرفەت بدرێت قوتابیان بە زمانی دایك وەڵام بدەنەوە و وەرگێڕی پێویستیش بۆ ڕوونكردنەوەی وانەكان دابین بكرێت.

ئەوەی پێویستە بكرێت: دەستەی ناوچە كوردستانییەكانی دەرەوەی ئیدارەی هەرێم، بە پێویستی دەزانێت، بڕیارەكەی وەزارەتی خوێندنی باڵا، بە بڕیار هەڵبوەشێنرێتەوە نەك بە گفتوگۆی زارەكی، عێراق و دەستوورەکەی موڵکی گەلانی عێراقە، لەم چوارچێوەیەشدا مافی ڕەوای خەڵکی کوردستانە شەڕی زەوتکردنی مافە دەستورییەکانی لە چوارچێوەی یاسا بەرکارەکاندا ئەنجامبدات؛ لە بەردەوامی ئەم کێشەیە و پابەند نەبوون بە ماددەی چواری دەستوور و پێشێلکردنی، دەستەكە ڕێگەی دادگای فیدڕاڵی دەگرێتە بەر.